Aysel Qarabəyli Zülfüqar:

Bir mərdimazar peyda olub əhvalımızı korlamasaydı... 

Iki həftə əvvəl qardaşımın maşınında bir neçə tur atdıq. Daha doğrusu, şəhərin başından girib, ayağından çıxdıq. "Ağ günə çıxmış"  Ağ şəhərdən də keçdik. Gözəl musiqilərin ritmləri altında coşmuşduq. Bir sözlə, kefimiz saz idi, axıradək belə də qalacaqdı, bir mərdimazar peyda olub əhvalımızı korlamasaydı... Evin yolunu tutmuşduq. 3cü mikrorayon bazarının yaxınlığında polis maşının siqnalını eşidib məcburən dayandıq.  Təəccüblənmişdik...  Zənnimizcə, heç bir yol hərəkəti qaydasını pozmamışdıq. Qardaşım maşını 70-lə sürürdü. Post patrul xidmətinin nümayəndəsi maşına yaxınlaşıb özünü təqdim etdi :
  - Polis serjantı Filankəsov Filankəs. Sənədlərinizi təqdim edin. 
Qardaşım dinməzcə sənədləri təqdim etdi. Polis serjantı sənədlərdə işinə yarayacaq heç bir qayda pozuntusuna rast gəlməyib, qardaşıma nəzər yetirdi. Təhlükəsizlik kəmərlərimizi də taxmışdıq. Bundan da bir şey çıxmadığını görən Filankəsov Filankəs :
  - Içkili deyilsiniz?- deyə qardaşımdan soruşdu. 
  Qardaşım özünə tam əminliklə : 
- Yox, qardaş, mən ümumiyyətlə içən deyiləm, - deyə polis serjantının pul qoparmaq arzularını ürəyində qoydu. O isə təslim olmaq istəmirdi. Bir ehtimal bəlkə bir şey çıxar deyə, içkiölçən cihazı qardaşımın ağzına yaxınlaşdırdı. Qardaşım səbrini basıb, üfürdü. İçkiölşən cihaz qardaşımın tam ayıq olduğunu elə bil polis serjantının gözünə soxarcasına sübut edirdi. Polis serjantının əsəbdən rəng - ruhu qaralmışdı.  Bir bəhanəylə qardaşımı günahkar çıxarmaq istəyirdi. Elə bil çoxdan axtardığı şeyi tapan adamlar kimi sevincək : 
- Sükan arxasında telefonla danışmaq qadağandır, - dedi.  Qardaşım polis serjantının son ümidini də puç etdi. 
  - Qardaş, bu, maqnitofon pultudur, telefon deyil.
Polis serjantı bütün cəhdlərinin boşa çıxmasının verdiyi utanc hissiylə maşından uzaqlaşdı. Bizə elə gəldi, gedərkən dodağının altında nəsə donquldanırdı. Bəlkə də, daş qayaya rast gəldiyi üçün özünü söyürdü. )
(FOTO: 2018-ci ilin bu günü...)