Ərdoğan: 2024-cü il Olimpiadasının açılış mərasimi qəzəb doğurur

Türkiyə prezidenti Rəcəb Tayyib Ərdoğan Roma Papası Fransisklə telefon danışığı aparıb.

Bu barədə Türkiyə Prezidenti Administrasiyası yanında Kommunikasiya Departamentinin məlumatında deyilir.

Söhbət zamanı Türkiyə lideri qeyd edib ki, 2024-cü ildə Parisdə keçiriləcək Yay Olimpiya Oyunlarının açılışındakı əxlaqsız səhnələr hiddət və mənfi reaksiyalara səbəb olub.

Türkiyə dövlətinin başçısı qeyd edib ki, söz azadlığı və tolerantlıq bəhanəsi ilə insan ləyaqəti tapdanır, dini-mənəvi dəyərlər ələ salınır.

Onun sözlərinə görə, bu cür aksiya müsəlmanlar üçün xristian dünyasının nümayəndələrindən az təhqiramiz deyil. O, belə bir tendensiya qarşısında kollektiv etirazın və vahid mövqedən çıxış etməyin vacibliyini vurğulayıb.

Prezident Ərdoğan insanları birləşdirməyi hədəfləyən olimpiya oyunlarının açılışı zamanı dünyanın şahidi olduğu dini dəyərlərə meydan oxuma, təhrif olunmuş təbliğat və mənəvi çöküşün xəbərdarlıq əlaməti olduğu barədə xəbərdarlıq edib.

Qəzza zolağındakı vəziyyətə toxunan Türkiyə dövlət başçısı bildirib ki, İsrailin Qəzza zolağına hücumları soyqırıma çevrilib və regionda genişmiqyaslı humanitar böhran yaşanır.

Türkiyə liderinin sözlərinə görə, İsrail bir sıra dövlətlərin ona verdiyi diplomatik, iqtisadi və hərbi çətir altında fələstinlilərə qarşı qırğınlar həyata keçirir.

O qeyd edib ki, bu yaxınlarda Fələstinin HƏMAS hərəkatının Siyasi Bürosunun sədri İsmayıl Haniyənin öldürülməsi və Livana hücum İsrailin bütün region, dünya və bəşəriyyət üçün təhlükə yaratdığını bir daha nümayiş etdirdi.

Prezident Ərdoğan vurğulayıb ki, “bəşəriyyət ittifaqı” müsəlmanların və xristianların, xüsusilə Fələstində yaşayanların sülh tapması üçün təcili tədbirlər görməlidir.

Roma Papası Fransisk Türkiyə prezidentinə sülhün bərqərar olması üçün göstərdiyi səylərə və dini dəyərlərin ələ salınması probleminə göstərdiyi həssaslığa görə minnətdarlığını bildirib.