Gürcüstan Türkiyədən VURAN zirehli transportyorları alıb

Türkiyənin VURAN minadan qorunan zirehli texnikası Gürcüstan Silahlı Qüvvələrinə verilib.

Vazianidəki 4-cü piyada briqadasının ərazisində hərbi texnikanın təhvil verilməsi mərasimi keçirilib. Tədbirdə Türkiyənin Tbilisidəki səfiri Əli Kaan Orbay, Gürcüstan müdafiə nazirinin müavini Serqo Canelidze, Müdafiə Qüvvələri komandanının müavini briqada generalı İrakli Çiçinadze və başqaları iştirak ediblər.

Türkiyə səfiri Orbay və Gürcüstan rəsmiləri zirehli maşınlara baxış keçiriblər.

Gürcüstan Silahlı Qüvvələrinə texnikanın verilməsi Türkiyənin dəstəyinə nümunədir.

“Bu zirehli texnika həm də Türkiyənin Gürcüstanın təhlükəsizliyinə, müstəqilliyinə və ərazi bütövlüyünə verdiyi güclü dəstəyin konkret göstəricisidir. İnanırıq ki, bu maşınlar Gürcüstanın çəkindirmə və müdafiə qabiliyyətinin inkişafında mühüm rol oynayacaq”, - Orbay bildirib.

Türkiyənin müdafiə sənayesi kompleksindən danışan Türkiyə səfiri bildirib ki, Türkiyə bu gün yerli istehsalın və daxili resursların 80 faizinə qədərini cəlb etməklə öz müdafiə ehtiyacını ödəyə bilər.

Biz gözləyirik ki, Gürcüstan ən qabaqcıl texnologiyalardan istifadə etməklə istehsal olunan, sınaqdan keçirilmiş müdafiə təyinatlı məhsullarımıza üstünlük verəcək”, - Orbay bildirib.

Səfir qeyd edib ki, Türkiyə ən qısa tədarük xətti sayəsində Gürcüstanın ehtiyaclarını ən sərfəli şəkildə ödəmək imkanına malikdir.

“Biz istəyirik ki, əməkdaşlığımız həm hərbi, həm müdafiə, həm də istənilən digər sahədə genişlənsin”.

Öz növbəsində Gürcüstanın müdafiə nazirinin müavini Serqo Canelidze də Türkiyə ilə əməkdaşlığın vacibliyini vurğulayıb.

“Gürcüstan və Türkiyə müdafiə sahəsində uzun müddətdir və uğurla əməkdaşlıq edir. Bu gün Gürcüstan Müdafiə Qüvvələri Türkiyədən NATO standartlarına uyğun zirehli texnika alır. Bu cür tədbirlər Gürcüstan üçün çox vacibdir, çünki ölkəmizin müdafiə qabiliyyəti güclənəcək, Müdafiə Qüvvələri NATO standartlarına uyğunlaşmağa yaxınlaşacaq”.