Texnologiya şirkətləri İsrailin dezinformasiya hesablarını bloklamağa başlayıb

İsrailin Qəzzaya hücumları barədə dünyanı xəbərdar edən ən mühüm vasitələrdən birinə çevrilən sosial media platformaları və texnologiya şirkətləri son günlər İsrailin dezinformasiya hesablarını silməyə başlayıb.

İsrailin hücumlarının başlamasından bu yana ən təsirli kanallardan birinə çevrilən sosial media manipulyasiya halları ilə də gündəm olub. Oktyabrın 7-də qarşıdurmaların başladığı gündən bəri bir çox sosial media platformalarının, xüsusilə X, Meta, Google və "TikTok"un istifadəçilərin görmək istədikləri deyil, alqoritmlərlə müəyyən edilən gündəmi yaymaq cəhdləri bütün dünyada ciddi tənqidlərə məruz qalıb.

2023-cü ilin Noyabr Forbes hesabatına görə, Meta və Tiktok İsraildən gələn 8000 sorğunun 94 faizini yerinə yetirdi və bir çox jurnalist və sənətçi müharibə başlayandan bəri yazılarının sosial media platformaları tərəfindən bloklandığını söylədi.

Bu inkişaflara baxmayaraq, sosial media platformaları Fələstinlilərin Qəzzaya edilən hücumlara reaksiya verməyə davam etdiyi üçün bütün dünyada istifadəçilərin öz səslərini bildirmələri üçün ən populyar məkanlardan birinə çevrilib.

Keçən həftə dünya üzrə 30 milyondan çox Instagram istifadəçisi süni intellektlə yaradılmış görüntünü paylaşaraq İsrail ordusunun Rafahdakı köçkün Fələstin düşərgələrinə hücumlarına reaksiya verib.

Instagram Qəzza qətliamı ilə bağlı məzmuna senzura tətbiq etməkdə günahlandırılsa da, platformanın sözçüsü bəzi zorakı məzmunun silindiyini etiraf edib.

Bu yaxınlarda sosial media və süni intellekt şirkətləri dezinformasiyaya görə İsraillə əlaqəli hesabları siliblər. Facebook, Instagram, Threads və "WhatsApp"a sahib olan Meta, İsrail də daxil olmaqla ölkələrdən dezinformasiya yaratmaq üçün süni intellekt vasitələrindən istifadə edən gizli təsir kampaniyaları ilə əlaqəli yüzlərlə Facebook hesabını silib.

"Meta"nın 2024-cü ilin birinci rübü üçün təhdid hesabatında deyilir ki, İsraildə yerləşən “koordinasiya edilmiş qeyri-əsaslı davranış” şəbəkəsi media orqanlarının və ictimai xadimlərin səhifələri altında, ehtimal ki, süni intellekt tərəfindən yaradılan şərhlər yerləşdirir.

Hesabatda 510 Facebook hesabının, İsraildə fəaliyyət göstərən 11 səhifə və qrupun, 32 Instagram hesabının bu cür davranışlarla şirkət siyasətini pozduqları üçün silindiyi və şəbəkənin ABŞ və Kanadadakı auditoriyanı xüsusi olaraq hədəf aldığı qeyd edilib.

Texnologiya dünyasından daha bir xəbər baş ofisi ABŞ-də yerləşən OpenAI şirkətindən gəlir. Şirkət İsrail də daxil olmaqla ölkələrdən dezinformasiya yaratmaq üçün süni intellekt vasitələrindən istifadə edərək gizli təsir kampaniyaları ilə əlaqəli hesabları dayandırıb.