İsrailin Qəzzaya hücumu nəticəsində qurbanların sayı 36171-ə çatıb

Fələstinin Qəzza zolağındakı Səhiyyə Nazirliyinin bəyanatında deyilir ki, İsrailin 7 oktyabr 2023-cü il tarixindən blokada altında olan Qəzza zolağına davam edən hücumları nəticəsində həlak olan fələstinlilərin sayı 36 171-ə yüksəlib.

Son 24 saat ərzində İsrail ordusu 6 qırğın törədib, 75 fələstinli həlak olub. Bundan əlavə, daha 284 nəfərin yaralandığı bildirilir.

Beləliklə, İsrailin oktyabrın 7-dən bəri davam edən hücumları zamanı ölənlərin ümumi sayı 36 171 nəfərə, yaralıların sayı isə 81 420 nəfərə çatıb, Qəzza Səhiyyə Nazirliyi qeyd edib.

Ölənlərin cəsədləri hələ də dağılmış binaların dağıntıları altında və yol kənarlarında qalır. Departament əlavə edib ki, İsrail qüvvələrinin yaratdığı maneələr səbəbindən təcili yardım və mülki müdafiə qrupları onlara çata bilmir.

Səhiyyə Nazirliyindən verilən digər açıqlamada isə Tel əs-Sultan bölgəsində yerləşən doğum evinin İsrail ordusunun Rəfah şəhərində həyata keçirdiyi hücumlar səbəbilə xidmət göstərməkdə ciddi problemlərlə üzləşdiyi bildirilib.

Öz növbəsində Qəzza Səhiyyə Nazirliyinin rəsmi nümayəndəsi Əşrəf əl-Qudra bildirib ki, İsrail ordusu Rəfah şəhərində və Qəzza zolağının şimalında səhiyyə sistemini qəsdən məhv edir.

“İşğalçı İsrail ordusu Rəfah və Qəzza zolağının şimalında tibb müəssisələrinin mövcudluğunu tamamilə məhv etməyə cəhd edib. Səhiyyə sisteminin Rəfah və Qəzzanın şimalındakı silsilə qətliamların öhdəsindən gəlmək gücü yoxdur”, - Kudra bildirib.

Bundan əlavə, bir fələstinli rəsmi İsrail ordusunun elan etdiyi “təhlükəsiz bölgələr”ə münasibət bildirib.

"İşğalçı İsrail Mevasi bölgələrinin təhlükəsiz olduğunu iddia edərək dünyanı aldadır və bu bölgələrdə dəhşətli qırğınlar törədir", - Kudra qeyd edib.

Qəzza Səhiyyə Nazirliyinin nümayəndəsi Qəzzaya daxil olmaq üçün yanacaq və tibbi yardım üçün təhlükəsiz dəhlizlərin açılmasını, həmçinin İsrailin tibb qrupları və təşkilatlarına qarşı davam edən təhdidlərinə son qoyulmasını tələb edib.