Lənkəranda “Gənc xilasedici və yanğınsöndürən” yarışlarının zona birinciliyi keçirilib

Fövqəladə Hallar Nazirliyinin  (FHN) Cənub Regional Mərkəzinin təşkilatçılığı ilə Lənkəranda regionu əhatə edən orta və ümumtəhsil müəssisələri arasında “Gənc xilasedici və yanğınsöndürən” yarışlarının zona birinciliyi keçirilib. Yarışlarının keçirilməsində əsas məqsəd yeniyetmə və gənclərin fövqəladə hallara hazırlıq səviyyəsinin yüksəldilməsi, məktəblilər arasında şəxsi və ictimai təhlükəsizliyə məsuliyyətli yanaşma hissinin artırılması və gənc nəsildə hərbi vətənpərvərlik ruhunun aşılanmasından ibarət olub.

Lənkəran - Astara Regional Təhsil İdarəsi və Lənkəran şəhər Gənclər və İdman İdarəsinin əməkdaşlarının iştirak etdiyi zona birinciliyinə regionun 6 məktəb komandası qatılıb. 

Yarışın yekun nəticəsində Yardımlı şəhərindəki V.Məmmədov adına 2 nömrəli tam orta məktəbinin komandası I yerə, Lənkəran şəhərindəki R.Məmmədov adına 5 nömrəli tam orta məktəbin komandası II yerə və Cəlilabad şəhər 3 nömrəli tam orta məktəbinin komandası III yerə layiq görülüb. 

Yardımlı şəhər V.Məmmədov adına 2 nömrəli tam orta məktəbinin komandası Qəbələ şəhərində keçiriləcək “Gənc xilasedici və yanğınsöndürən” yarışlarının respublika birinciliyində iştirak etmək hüququ qazanıb.

Ağaddin BABAYEV