Masallıda orta aylıq nominal əməkhaqqı 6,6 faiz artıb

Masallı Rayon Statistika İdarəsindən verilən məlumata əsasən bildiririk ki, rayon ərazisində məşğul əhalinin tərkib hissəsi olan muzdla çalışan işçilərin sayı 2024-cü ilin yanvar-mart aylarında  15545 nəfər, o cümlədən iqtisadiyyatın dövlət sektorunda 7937 nəfər (51,2 faiz), qeyri-dövlət sektorunda isə 7588 nəfər (48,8 faiz) təşkil etmişdir. 

Muzdlu işçilərin 23,7 faizi məhsul istehsalı sahələrində, 76,3 faizi isə xidmət sahələrində çalışanlardır.

2024-cü ilin yanvar-mart aylarında muzdla çalışan işçilərin orta aylıq nominal əməkhaqqı 2023-cü ilin müvafiq dövrünə nisbətən 6,6 faiz artaraq 591,9 manat olmuşdur. Dövlət  müəssisələrində çalışan işçilərin əməkhaqqları 720,3 manat (əvvəlki ilin müvafiq dövründən 6,8 faiz çox), özəl müəssisələrdə isə 455,7 manat (əvvəlki ilin müvafiq dövründən 8,5 faiz çox) təşkil etmişdir.

Elektrik enerjisi, qaz və buxar istehsalı, bölüşdürülməsi və təchizatı bölməsində, maliyyə və sığorta sahəsində, dövlət idarəetməsi və müdafiə, sosial təminat bölməsində, təhsil, səhiyyə, sosial xidmətlər, informasiya və rabitə sahəsində orta aylıq nominal əməkhaqqı digər sahələrdən daha yüksək olmuşdur.