Hümbət Quliyev: 

Toy masası haqda

(esse)

Dostlar, toy məclislərimizin çox problemləri var. Vacib saydığım biri üzərində dayanmaq istəyirəm.

Toylarımızın bir özəlliyi də odur ki, toy yiyəsinin bütün səylərinə baxmayaraq bir masa arxasında bir- birini tanımayan insanlar da olurlar. Biləsiniz ki, yemək insan üçün intim məsələdir, yəni insan tanımadığı insanların yanında yemək yeyəndə narahatçılıq hissi keçirir.

Bu niyə belə olur? Iş ondadir ki, hər bir insann təhtəlşüuru var. Bunun nə olduğunu başa düşmək üçün şəhadət barmağınızla gözünüzün bəbəyinə toxunmağa çalışın. Elə indi cəhd edin. Alındı? Alınmayacaq. Göz qapağınız sizdən asılı olmayaraq, daha doğrusu, iradənizin tam əksinə bağlanacaq. Bax sizin iradənizin əksinə belə bunu edən sizin təhtəlşüurunuzdur. Bu bizi özümüzdən belə qoruyan şüur formasıdır.

Təhtəlşüurumuz bizdən asılı olmayaraq istənilən yad adamı təhlükə mənbəyi kimi qəbul edir. Belə "təhlükəli" şəraitdə iştahdan və şənlənməkdən söhbət gedə bilməz.

Biz yalnız doğma və dost insanların əhatəsində rahat yeyə və şənlənə bilirik, yəni təhtəlşüurumuzun özünü rahat hiss etdiyi şəraitdə.

Xarici ölkələrdə bu problem belə həll olunub: "Şved masası" deyilən forma var, yeməklər divar boyu uzun masalara düzülür, insan öz boşqabına özü istediyi təamları götürüb, yaxşı tanıdığı insanların arasında rahat yeyir və ürəkdən də şənlənir.

Yeri gelmişkən, təhtəlşüuru

" keyləşdirən" vasitə “alkoqollu içkilərdir. " Vurandan" sonra bütün insanlar sənə "dost" görünür.

Bu səbəbdən, barlarda , restoranlarda, yad insanların əhatəsində şənlənməyin yeganə yolu içkidən keçir. Bizim toylarda da bəziləri bu üsuldan gen- bol istifadə edir. Fikir vermisinizsə, ən şən masa "vuranların" masası olur.

Içməyənlər nə etsinlər? Həkim məsləhətim: Birincisi, öz masanıza çatanda, tanımadığınız insanlarla belə səmimi görüşün, gülərüz olun. Bununla siz oturanların təhtəlşüurunu sakitləşdirirsiniz, onlara mesaj göndərirsiniz ki, arxayın olun mən dostunuzam və məndən sizə heç bir xətər dəyməz. Onların da xoş cöhrələri sizin də təhtəlşüurunuzu rahat edəcək . Daha özünüzün vacib adam olduğunu bildirmək üçün üz- gözünüzə zəhrimar yapışdırmayın.

Belə halda qıraqdan saman üzərində oturmuş itə bənzəyəcəksiniz, nə özünüz yeyə biləcəksiniz, nə də başqalarına imkan verəcəksiniz.

Təkrar edirəm, təbəssüm təhtəlşüurü sakitləşdirən universal üsuldur, sifətinizdən onu əskik etməyin, xüsusən də təzə tanış olduğunuz insanlarla ünsiyyətdə olanda.

Dostlar, hamınıza rahat təhtəlşüurla xoş məclislər diləyirəm.

Hümbət Həsənoğlu