Aleksey Navalnının anası oğlunun cəsədini görə bilib

Lyudmila İvanovna Navalnaya dedi ki, bir gün əvvəl ona oğlunun cəsədi gizli şəkildə göstərilib. İndi o, deyir ki, müstəntiqlər onu şantaj edir və gizli dəfn tələb edirlər, “məni qəbiristanlığın kənarına, təzə məzara aparıb: “Oğlunuz buradadır” demək istəyirlər. Mən bununla razı deyiləm”, - deyə Lyudmila Navalnaya bildirib. Müxalifətçi siyasətçinin anası hədələndiyi üçün videomüraciət çəkdiyini bildirib.

“Mən indicə Salekhard şəhərinin İstintaq Komitəsinin binasından çıxdım. Demək olar ki, bir günümü orada tək, müstəntiqlər və kriminoloqlarla tək keçirdim. Vəkili ancaq günorta buraxdılar. Dünən axşam məni gizlicə meyitxanaya apardılar, orada Alekseyi göstərdilər. Müstəntiqlər iddia edirlər ki, ölümün səbəbini bilirlər, əllərində bütün tibbi-hüquqi sənədlər hazırdır, mən bunu gördüm və tibbi ölüm haqqında arayışa imza atdım. Qanuna görə, dərhal Alekseyin cəsədini mənə verməli idilər, amma hələ bunu etməyiblər”, - Aleksey Navalnının anası videomüraciətində deyir.

"Əvəzində məni şantaj edirlər, Alekseyin harada, nə vaxt və necə dəfn olunması ilə bağlı mənə şərt qoyurlar. Bu qanunsuzdur. Mənim hüzurumda onlar ya Kremldən, ya da İstintaq Komitəsinin mərkəzi aparatından əmr alırlar. İstəyirəm ki, Alekseyin əziz olduğu və ölümü şəxsi faciəsi olan sizin onunla vidalaşmaq fürsətiniz olsun. Məni hədələməyə başladılar deyə bu videonu çəkirəm.Gözlərimin içinə baxanda deyirlər ki, gizli yas mərasiminə razı olmasam, oğlumun meyiti ilə nəsə edəcəklər. Müstəntiq Voropayev mənə açıq dedi: vaxt sənin tərəfində deyil, meyit çürüyür. Mən xüsusi şərtlər istəmirəm, sadəcə hər şeyin qanuna uyğun olmasını istəyirəm. Oğlumun meyitinin dərhal mənə verilməsini tələb edirəm”- Lyudmila Navalnaya söyləyib.