Bəybala Mirzəyev: 

Tarixin və taleyin istehzası...

Böyük Britaniyanın bütün dünyada “Dəmir ledi” kimi məşhurlaşmış sabiq Baş naziri Marqaret Tetçer 20 Yanvar qırğınından dörd gün sonra, 24 yanvar 1990-cı ildə “Wall Street Journal” qəzetinə müsahibəsində keçmiş SSRİ-nin cəllad rəhbəri Mixail Qorbaçovun Azərbaycana işğalçı sovet ordusunun yeridilməsi ilə bağlı qərarını kor-koranə dəstəkləyib.

Hadisənin əsl səbəbi və mahiyyətindən xəbərsiz olan M.Tetçer müsahibəsində bildirib ki, guya, həmin vaxt Mixail Qorbaçov vətəndaş müharibəsinin qarşısını almaq üçün bu addımı atmağa məcbur olub: “Azərbaycanlılarla ermənilər arasında vətəndaş müharibəsi sovet ordusunu yeritməyə səbəb olub. Çünki günahsız adamlar zərər çəkirdilər. Heç kim – nə ABŞ prezidenti Buş, nə mən, nə də Fransa prezidenti Mitteran buna görə Qorbaçova etiraz etmədik. Biz bu addımın vacibliyini başa düşürdük”.

Beləliklə, həm Tetçer, həm də digər Qərb liderləri həmin vaxt Qorbaçovun xalqımıza qarşı, müstəqillik uğrunda mübarizəmizə qarşı qanlı addımını dəstəkləyib.

Lakin aradan cəmi iki il keçdikdən sonra, 1992-ci il sentyabrın 7-8-də elə həmin Marqaret Tetçer əsl ingilis soyuqanlılığına və riyakarlığına bürünərək müstəqil Azərbaycana qeyri-rəsmi səfərə gəlib.

Bu gəlişin məqsədi?

Onu ölkəmizə gətirən Bakı neft və qazı idi. O, dünya neft nəhəngi BP ("Britiş Petroleum") üçün lobbiçilik etməyə gəlmişdi. Başqa sözlə desək, ölkəsi üçün neft dilənməyə gəlmişdi.

Belə ki, Tetçer sentyabrın 7-də Bakıya səfəri zamanı Azərbaycanın o zamankı prezidenti Əbülfəz Elçibəylə görüşüb, daha sonra "Çıraq" və "Şahdəniz" yataqlarında neft və qaz ehtiyatlarının miqdarının dəqiqləşdirilməsi və qazma-hazırlıq işlərinin aparılması haqqında Azərbaycan hökuməti ilə İngiltərənin "Britiş Petroleum" və Norveçin "Statoyl" şirkətləri arasında sazişin imzalanması mərasimində iştirak edib.

Ertəsi günü onu Bakının gəzməli, görməli yerləri ilə tanış ediblər. Tetçer İçərişəhəri gəzib. Elə bu fotoşəkil də həmin vaxt Qız Qalasının yanında çəkilib.

Gəzinti zamanı Tetçeri Polad Bülbüloğlu, Fərhad Bədəlbəyli, Nəcəf Nəcəfov və digər şəxslər müşayiət edib.

P.S.

Lakin Tetçer 20 Yanvar qırğını zamanı Qorbaçovu dəstəkləməyinin səhv addım olduğunu etiraf etməyib, üzr istəməyib. Çünki Tetçer də beyni "qara qızıl" qoxusundan dumanlanmış siyasətçilərdən biri idi.