Şəhid mayor Anar Novruzovun 50 illiyi qeyd olundu

“Akula”nın xatirəsi anıldı

Mayın 12-də Masallı rayonunun Ərkivan qəsəbəsində Aprel və Tovuz döyüşlərinin qəhrəmanı, 3-cü dərəcəli “Vətənə xidmətə görə” ordenli şəhid mayor Anar Novruzovun (12.05.1976 – 14.07.2020) anadan olmasının 50 illiyinə həsr edilmiş anım tədbiri keçirilib.
Tədbir şəhid zabitin məzarı önündə təşkil olunub. 
Anım mərasimində rayon rəsmiləri, şəhidin ailə üzvləri və yaxınları, digər şəhid ailələri, müharibə iştirakçıları, qəsəbə sakinləri və ictimaiyyət nümayəndələri iştirak ediblər.
Şəhid mayorun məzarı üzərinə gül dəstələri düzülüb, ruhuna dualar oxunub, ailəsinə başsağlığı və ehtiram ifadə olunub.
Çıxış edən jurnalist-publisist Akif Ağayev, iş adamı Məşkur Qasımov, Ərkivan qəsəbə 1 saylı tam orta məktəbin müəllimi Əflatun Qurbanov və digər natiqlər İyul döyüşlərinin əhəmiyyətindən, Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində qazanılan Böyük Zəfərdən danışıblar. Bildirilib ki, “Akula” ləqəbi ilə tanınan kəşfiyyatçı Anar Novruzovun şərəfli döyüş yolu və vətənə sədaqəti gənc nəslə örnəkdir.
Şəhidin məzunu olduğu C.Cabbarlı adına Ərkivan qəsəbə 1 saylı tam orta məktəbin şagirdləri vətənpərvərlik mövzusunda şeirlər səsləndiriblər.
Tədbirin sonunda şəhidin əmisi Bəyverdi Novruzov və qardaşı Sucəddin Novruzov çıxış edərək ailəyə göstərilən diqqət və qayğıya görə dövlət başçısına, rayon rəhbərliyinə, həmçinin Anar Novruzovun 50 illiyi münasibətilə keçirilən idman tədbirlərinə görə Lənkəran-Astara Regional Gənclər və İdman İdarəsinin rəhbərliyi və kollektivinə minnətdarlıqlarını bildiriblər.
          ***            
Məlumat üçün bildirək ki, Anar Gülverdi oğlu Novruzov 12 may 1976-cı ildə Masallı rayonunun Ərkivan kəndində anadan olub. Ailənin sonbeşiyi olan Anar C.Cabbarlı adına kənd orta məktəbini (Ərkivan qəsəbə 1 saylı tam orta məktəbi) əla qiymətlərlə qurtarıb. 1993-cü ildə Bakı Neft Texnikumuna (indiki Neft-Energetika Kolleci) daxil olsa da 6 aydan sonra işğal altında olan torpaqlarımızı geri qaytarmaq niyyəti ilə Orduya yazılıb. Sonra təhsilini davam etdirib. 1999-cu ildə  Ali Birləşmiş Komandanlıq Məktəbini (indiki Heydər Əliyev adına Hərbi İnstitut) bitirib, “Taktiki motoatıcı qoşunları komandiri” ixtisasına yiyələnib. 1998-2013-cü illərdə ön cəbhə bölgələrində, 2013-2018-ci illərdə Sumqayıtda Vətənə xidməti borcunu ödəyib. 2016-cı ilin Aprel döyüşlərində şücaətlə iştirak edərək qəlpə yarası alıb. 2018-2020-ci illər ərzində ən qaynar döyüş bölgələrində olub. Türkiyədə mükəmməl peşəkar təlim keçib. 25 ildən artıq hərb sahəsində çalışıb. Siyasi işlər üzrə tabur komandirinin müavini vəzifəsinə kimi yüksəlib. Xidmət etdiyi illərdə hərbi texnikanın sirlərini dərindən mənimsəyib. Snayperdən atdığı dəqiq atəşlə onlarla düşmən əsgər və zabitini məhv edib. Ona nahaq yerə AQS-17 silahının “atası” adı verilməyib. “Akula” ləqəbli kəşfiyyatçı düşmənlərin kabusuna çevrilib – ermənilərə od qoyub, lap əfsanəvi “Mixaylo” kimi... Hətta onu öldürənə pul mükafatı da ayırıbmışlar.
Döyüş dostlarının dediyinə görə tabeliyində olanda əsgərlərlə sanki dost, qardaş kimi davranan təcrübəli zabit Anar Novruzov çətin məqamlarda yüz ölçüb-bir biçməyi üstün tutarmış. Xidməti ərzində heç kimdən təmənna ummayıb...
A.Novruzov müxtəlif illərdə Azərbaycan Respublikasının Prezidenti adından Müdafiə Nazirinin “Qüsursuz xidmətə görə” I, II, III dərəcəli, “Azərbaycan Respublikası Silahlı Qüvvələrinin” yubiley medalları, eləcə də rəhbərlik tərəfindən döyüşlərdə, istimai-siyasi və mənəvi-psixoloji hazırlığında əldə etdiyi yüksək nailiyyətlərə görə Fəxri fərmanlarla təltif edilib.
Prezident İlham Əliyevin müvafiq Sərəncamı ilə Anar Novruzov (ölümündən sonra) 3-cü dərəcəli “Vətənə xidmətə görə” ordenli ilə təltif edilib. Şəhid adının əbədiləşdirilməsi məqsədilə qəsəbədəki küçələrdən birinə şəhidin adı verilib, vaxtilə yaşadığı evin qarşısında büstü qoyulub. 
Ailəli idi, iki övladı yadigar qalıb.
 

Akif AĞAYEV