“ALLAH SİZDƏN RAZI OLSUN, XƏLİL HƏKİM...”

Şəhid atasından minnətdarlıq məktubu

Mən özümü başa düşəndən, həyatı dərk edib anlayandan ta bu günə kimi bir məsələni əlimdə bayraq, dilimdə şüar etmişəm ki, böyüklüyündən, kiçikliyindən asılı olmayaraq, edilən hər hansı bir yaxşılıq üçün mütləq təşəkkür edilməlidir. Təşəkkür insanı mənən rahatlaşdırır, ruhən saflaşdırır, daxilən paklaşdırır. Könlündə, qəlbində, cismində xoş duyğulara, nəcib hisslərə vəsilə olur. Kini, küdurəti, ədavəti, paxıllıq və qısqanclıq hisslərini aradan qaldırır.  Biz bir "sağ ol", "çox sağ ol", "Allah köməyin olsun" deyərək, qarşı tərəfə öz təşəkkürümüzü, səmimiyyətimizi bildiririk. Bəzən də ən şirin, ən səmimi dua və təşəkkür yerinə "Allah səndən razı olsun!" - deyirik. İnsanın ən böyük qazancı elə Allah-taalanın rizası, rəğbəti və ondan razılığıdır. Məncə, insana təşəkkürün ən uca məqamı bu deyimlə ifadə olunur. Çünki Allah bir kəsdən razı olarsa, o adam artıq çox şey qazanmış olur.

Mənim bu yazımın kökündə də, təşəkkür dayanır, minnətdarlıq hissi dayanır, haqqında danışacağım adamdan Allah-taalanın razı olması istəyi dayanır. Bu şəxs Respublika Diaqnostika Mərkəzinin Oftalmologiya şöbəsinin müdiri, tanınmış cərrah-oftalmoloq Xəlil Hüseynovdur. 

Təəssüratlarımı bölüşməzdən öncə istərdim ki, dəyərli oxuculara cərrah-oftalmoloq Xəlil Hüseynovun ömür yolu haqqında qısaca məlumat verim. Xəlil Hüseynov Bakı şəhərində anadan olub. 1986-1994-cü illərdə Azərbaycan Tibb Universitetində təhsil alıb. 1997-2001-ci illərdə Dominikan Respublikasının Santo Domingo şəhərində yerləşən  Pedro Henriquez Urena adına Universitetdə tibb təhsili alaraq ümumi oftalmoloq diplomuna layiq görülüb. 2002-2003-cü illərdə ABŞ-ın Florida ştatının Mayami şəhərində yerləşən Bascom Palmer Eye İnstitutunda ixtisaslaşma və təkmilləşmə məqsədilə bir illik fellowship “Cornea ve refraktive” cərrahiyyəsindən keçib. Daha sonra İspaniyada, Fransada, Avstriyada, İtaliyada, iki dəfə ABŞ-da kurslarda olub. 2004-2009-cu illərdə Bakıda CCR Qeyri-hökumət humanitar təşkilatlarının oftalmoloji şöbəsinin rəhbəri kimi fəaliyyət göstərib. 2007-2014-cü illərdə Bakıda BRİZ-L oftalmoloji klinikasında baş həkim işləyib. 2014-cü ildən bu günə kimi Respublika Müalicə Diaqnostika Mərkəzinin Oftalmologiya şöbəsinin müdiridir. Əhalinin tibbi maarifləndirilməsində və imkansız şəxslərə yardım məqsədilə televiziya kanallarında təşkil olunan xeyriyyə aksiyalarında yaxından iştirak edir. Güzəştli göz əməliyyatları həyata keçirir. Təmsil olunduğu beynəlxalq oftalmoloji cəmiyyətlərin konfranslarında vaxtaşırı iştirak edərək xarici həmkarları ilə informasiya mübadiləsində aktiv iştirak edir, öz təcrübələrini xarici mütəxəssislərlə bölüşür.

Qayıdıram əsas məqsədimə. Üç il bundan öncənin söhbətidir. Sol gözümdə ciddi problem əmələ gəlmişdi. Tədricən nurunu itirməyə başlamışdı. Bu hal həm məni, həm də ailə üzvlərini çox narahat etməyə başlamışdı. Məsləhət görülən bir neçə həkimə müraciət etdik, amma təəssüflər olsun ki, heç kim bu əməliyyatı boynuna götürmədi. Digər xəstəliklərim də olduğuna görə həkimlər özlərini risk altına almaq istəmirdilər. Gözümün bağının qırılmağından qorxurdular. 

Doktor Xəlil Hüseynovu da televiziyadakı çıxışlarından tanıyırdım. Bilirdim ki, nəzəri cəhətdən çox savadlıdır, bir çox ölkələrdə kurslarda olub. Amma, düzünə qalsa, əməliyyatları ilə bağlı heç nə bilmirdim. Fikirləşirdim ki, birdən...  Çünki o vaxta kimi nə mənim, nə də ailə üzvlərindən kiminsə gözlə bağlı problemi olmamışdı ki, yaxşı göz həkimi axtarışında olaq. Qızımın israrından sonra üz tutduq Bakıya. Bilirdik ki, Xəlil doktor Respublika Müalicə Diaqnostika Mərkəzində işləyir və Oftalmologiya şöbəsinin müdiridir. Və beləcə yol aldıq deyilən ünvana...

Mərkəzdə bizi çox səmimi, çox mehriban, xoş təbəssümlə qarşıladılar. Xəlil həkimlə görüşümüz də çox isti münasibət şəraitində keçdi. Mən bu insanın davranışına, səmimiyyətinə heyran oldum. Hərtərəfli müayinə etdi, mən bundan öncəki həkimlərin dediklərini də doktorun nəzərinə çatdırdım. Xəlil həkim digər xəstəliklərimlə də maraqlandı. Sonra dedi ki, heç bir narahatçılığa əsas yoxdur, 10 dəqiqənin içində sizi bu problemdən qurtaracağıq. Əməliyyatın vaxtı təyin olundu, digər xəstəliklərimlə bağlı önləyici tədbirlər görülməyə başlanıldı. Xəlil həkim ümidverici sözləri ilə elə bil ki, mənə dünyanı bağışladı. Gözümün sağalacağına yüz faiz inanmağa başladım.

Burda bir haşiyə çıxmaq istəyirəm. Mən nə Diaqnostika Mərkəzinə müraciət edəndə, nə də həkimin qəbulunda olanda şəhid atası olduğumu dilimə gətirməmişdim. Biz elə səviyyədə yanaşma, diqqət görmüşdük ki, şəhid ailəsi olduğumuzu deməyə zərurət yaranmamışdı. Amma... Amma necə oldusa, məsələ bilindi və bu dəfə bizi öncədən demədiyimiz üçün hələ qınadılar da. Bildirdilər ki, Mərkəzdə şəhid ailələrinə bütün tibbi xidmətlər pulsuzdur. Hələ qəbul və müayinə üçün ödənilən rüsumu da geri qaytardılar... 

Beləcə, əməliyyat yüksək səviyyədə keçdi və mən sol gözümdə olan narahatçılıqdan qurtardım... 

...Mən bir də bir neçə gün bundan öncə Xəlil həkimə müraciət etməli oldum, yəni üç ildən sonra. Bu dəfə isə sağ gözümlə bağlı. Eyni qarşılanma, eyni diqqət, eyni səmimiyyət, eyni sevgi və sayğı... Ümid dolu sözlər və nəticə etibarilə uğurlu əməliyyat... Artıq mən Xəlil həkimin sayəsində sağ gözümdəki problemlə də vidalaşmışam. 

Burda bir haşiyə də çıxmaq istəyirəm. İkinci əməliyyatdan qısa müddət sonra baxış üçün Diaqnostika Mərkəzinə getmişdim. Növbəyə dayanıb vaxtımı gözləyirdim. Birdən dəhlizin o başından Xəlil həkim məni gördü. Yanındakı yoldaşa nəsə dedi və o yoldaş da gəlib məni kabinetə sarı apardı. Xəlil həkim qapının ağzında gösləyirdi. Görüşdük, hal-əhval tutdu. 

- Orda niyə dayanmısan? - deyə soruşdu. 

- Növbə gözləyirəm, - dedim. 

- Sənə nə növbə? - deyib, qoluma girərək içəri apardı.

Bu haşiyəni çıxmaqda bir məqsədim var. Yuxarıda da qeyd etdiyim kimi, Xəlil doktor Respublika Müalicə Diaqnostika Mərkəzində Oftalmologiya şöbəsinin müdiridir. Özü necə səmimi, mehriban, qayğıkeşdirsə, rəhbərlik etdiyi şöbənin bütün tibb personalı da o qaydada səmimi və mehridandır. Hələ Nərgiz xanım... Şəhid atası olduğumu biləndə uşaq kimi ağlaması məni də kövrəltdi...

“Allah sizdən razı olsun, Xəlil həkim.” – Bu duanı, birinci əməliyyatdan bu yana bəlkə də yüzlərcə dəfə təkrarlamışam. Və bir daha bu təşəkkür məktubumda dilə gətirirəm: Allah Sizdən razı olsun, Xəlil həkim. Öz adımdan, ailəmiz adından Sizə dərin minnətdarlığımı bildirirəm. Ulu Yaradan canınızı sağ, ömrünüzü-gününüzü problemsiz, süfrənizi ruzili, bərəkətli etsin. Yaxşı ki, yer üzündə Sizin kimi dəyərli insanlar və bu dünya Sizin kimi yaxşıların sayəsində hələ ki, öz oxu ətrafında fırlana bilir. Bir daha var olun, səmimiyyət və ləyaqət simvolu Xəlil həkim!

Müslüm Abbasov,

şəhid atası, Sumqayıt şəhər sakini

Qeyd. 

Şəhid Elman Müslüm oğlu Abbasov - 1993-cü il iyulun 4-də torpaqlarımızın müdafiəsi uğrundakı müqəddəs savaşda 19 yaşında şəhidlik zirvəsinə yüksəlib.  

Sumqayıt şəhərindəki tarix muzeyində şəhidin adına yaradılan guşədə Elmanın sevimli sazı və digər şəxsi əşyaları, medalları saxlanılır.

2015-ci ildə şəhid haqqında şair, publisist Rahilə Veysəllinin “Elm və təhsil” nəşriyyatı tərəfindən respublikanın Əməkdar jurnalisti, tanınmış şair Rafiq Odayın redaktorluğu və ön sözü ilə “Həsrət yanğısı” adlı kitabı işıq üzü görüb.