Seutada miqrant qəbul mərkəzləri həddindən artıq dolub, yüzlərlə insan çimərlikdə yaşayır

İspaniya hakimiyyəti, Mərakeş sərhədinin kütləvi şəkildə pozulmasından sonra Afrikanın şimal sahilindəki Seuta anklavını hələ də tərk etməyən minlərlə qanunsuz miqrantın mövcudluğu ilə mübarizə aparır.

Bu barədə Qərb mediası məlumat yayıb.

Seuta meri Xuan Xesus Vivas mətbuata bildirib ki, anklavda 3000 ilə 5000 arasında miqrant qalıb.

Onun sözlərinə görə, yetkinlik yaşına çatmayanlar üçün ixtisaslaşmış mərkəz də daxil olmaqla, hər iki miqrant qəbul mərkəzi tam gücü ilə fəaliyyət göstərir və bütün gələnləri qəbul edə bilmir.

Bir neçə yüz miqrantın Seuta sahilində müvəqqəti düşərgə qurduğu bildirilir. Hərbi maşınlar və polis maşınları ərazidə patrul xidməti aparır.

Bu arada, İspaniya son dörd gündə təxminən 69.500 miqrantın Mərakeşə qaytarıldığını bildirib. Sərhədin İspaniya tərəfində yetmiş iki, Mərakeş tərəfində isə 11 nəfər ölüb.

Sənədsiz miqrantların çoxu yerli televiziyaya bildirib ki, pərakəndə satış məntəqələrinin bağlanması onları ərzaq almaq imkanından məhrum etdiyi üçün anklavı tərk etmək qərarına gəliblər. Bundan əlavə, onlar yerli əhalinin düşmənçiliyi ilə qarşılaşdılar və materik İspaniyaya səyahətlərini davam etdirə bilmədilər.

Seuta və Şimali Afrikadakı ikinci İspaniya anklavı Melilya Mərakeşin Aralıq dənizi sahilində yerləşir və miqrantlar tərəfindən Avropaya sərhədi keçmək üçün müntəzəm olaraq istifadə olunur.

Son günlərdə on minlərlə sənədsiz miqrant Mərakeşdən Seutaya daxil olub. 1 avqustda İspaniya tərəfi vəziyyətin "praktik olaraq normal vəziyyətə qayıtdığını" elan etdi.

Daha əvvəl Mərakeş Daxili İşlər Nazirliyi kütləvi sərhəd keçidinin sosial mediada yayılan dezinformasiya, qanunsuz qaçaqmalçıların fəaliyyəti və İspaniya hakimiyyətinin miqrasiya siyasəti ilə bağlı qərarlarının səhv şərh edilməsi ilə təhrik edildiyini bildirmişdi.