İran ABŞ və Hörmüz boğazı ilə bağlı Körfəz ölkələrini təhdid etdi

Tehran ABŞ-nin Hörmüz boğazının idarə olunmasına müdaxiləsinə icazə verməyəcək və Fars körfəzi ölkələrini Vaşinqtonla hər hansı bir əməkdaşlığın İranın milli təhlükəsizliyinə təhdid kimi qəbul ediləcəyi barədə xəbərdar edib.

İran Silahlı Qüvvələrinin Xatəm əl-Ənbiya Mərkəzi Qərargahının sözçüsü İbrahim Zülfəqari bu barədə bildirib.

O, ABŞ-nin Hörmüz boğazının idarə olunmasına təkrar müdaxiləsinin regional təhlükəsizliyə, beynəlxalq ticarətə və neft tankerlərinin və ticarət gəmilərinin naviqasiyasına ciddi təhlükə yaratdığını bildirib.

"Heç bir halda ABŞ-nin Hörmüz boğazının idarə olunmasına müdaxilə etməsinə icazə verməyəcəyik", - deyə Zülfəqari vurğulayıb.

O, həmçinin Fars körfəzi bölgəsindəki hər hansı bir qeyri-sabitliyə və vəziyyətin daha da gərginləşməsinə görə məsuliyyətin ABŞ və ABŞ ordusu ilə əməkdaşlıq edən dövlətlərin üzərinə düşdüyünü bildirib.

İran hərbi sözçüsü regional liderlərə xəbərdarlıq edərək bildirib ki, Amerika qüvvələrinə lojistik dəstək də daxil olmaqla, ABŞ ilə hər hansı bir əməkdaşlıq İranın suverenliyinə və milli təhlükəsizliyinə xələl gətirməyə yönəlmiş hərəkətlər hesab ediləcək.

Zülfəqarinin sözlərinə görə, bəzi regional dövlətlərin ABŞ-la əməkdaşlığı artıq müharibənin bütün bölgəyə yayılması riskini artırıb.

"Əgər münaqişə daha da şiddətlənərsə, müharibə alovu regiondakı bütün ölkələri bürüyəcək", - deyə o xəbərdarlıq edib.

İyulun 8-dən 13-dək ABŞ İran ərazisinə bir neçə dəfə hücum edib və bunun Tehranın Hörmüz boğazında ticarət gəmisinə hücumuna cavab olduğunu iddia edib. İran da öz növbəsində Yaxın Şərqdəki Amerika hədəflərinə hücumlar edib. Bəhreyn, Küveyt, BƏƏ, Oman və Qətər hakimiyyəti İranın hava hücumlarını dəf etdiyini bildirib.