Hikmət Hacıyev Şuşada Suriyanın informasiya naziri ilə görüşüb

İyulun 13-də Azərbaycan Prezidentinin köməkçisi və Prezident Administrasiyasının Xarici siyasət şöbəsinin müdiri Hikmət Hacıyev IV Şuşa Qlobal Media Forumu çərçivəsində Suriyanın informasiya naziri Xalid Fəvaz Zaarur və Rəqəmsal Media üzrə nazir müavini Məhəmməd Təfran ilə görüşüb.

Görüşdə Azərbaycan və Suriya arasında ikitərəfli münasibətlərin bütün sahələrdə uğurlu inkişafı məmnuniyyətlə qeyd edilib.

İki ölkə arasında münasibətlərin inkişafında iki lider arasında keçirilən görüşlərin və Suriya Prezidentinin Azərbaycana səfərinin əhəmiyyəti xüsusilə vurğulanıb. İki ölkə arasında informasiya və media sahələrində əməkdaşlıq da müzakirə olunub.

Hikmət Hacıyev Şuşa Qlobal Media Forumunda iştirakına görə Suriyanın informasiya nazirinə təşəkkürünü bildirib. O, gələn il Azərbaycanın İslam Əməkdaşlıq Təşkilatına sədrlik edəcəyini və təşkilatın Zirvə Toplantısına ev sahibliyi edəcəyini qeyd edib. Prezidentin köməkçisi həmçinin bu çərçivədə Azərbaycanda İƏT informasiya nazirlərinin görüşünün keçiriləcəyini açıqlayıb və suriyalı naziri tədbirdə iştirak etməyə dəvət edib.

Söhbət zamanı Azərbaycanla Suriya arasında mədəni, humanitar və təhsil sahələrində əməkdaşlıq məsələləri də müzakirə olunub və İSESCO çərçivəsində Suriyada məktəblərin təmiri və bərpasına Azərbaycanın dəstəyi yüksək qiymətləndirilib. Qeyd edilib ki, bu, ölkələrimiz arasındakı dostluğun nümunəsidir.

Görüşdə Azərbaycanın Suriyanın siyasi birliyinə, ərazi bütövlüyünə və suverenliyinə davamlı dəstəyi yüksək qiymətləndirilib.