WUF13 qlobal medianın diqqət mərkəzinə çevrilib

17 mayda Bakıda başlayan Dünya Şəhər Forumunun (WUF13) 13-cü sessiyası qlobal medianın diqqətini cəlb edib.

Sessiyanın beynəlxalq mediada işıqlandırılması Azərbaycanın bu mötəbər tədbirə yüksək səviyyədə ev sahibliyi etməsini vurğulayır. Qeyd olunur ki, forum iştirakçı ölkələrin şəhərsalma sahəsində atdığı addımları təqdim etmək, eləcə də beynəlxalq əməkdaşlığın qurulması və dərinləşdirilməsi üçün mühüm platformadır.

Pakistanın "The Nation", "Daily Times" və "The News" nəşrlərində dərc olunmuş məqalələrdə qardaş ölkənin WUF13-də nazirlər və digər yüksək vəzifəli şəxslərdən ibarət böyük bir nümayəndə heyəti ilə təmsil olunduğu bildirilir. Nəşrlərdə Pakistanın Pəncab əyalətinin baş naziri Məryəm Nəvaz Şərifin Pəncab Əlverişli Mənzil Layihəsini beynəlxalq auditoriyaya təqdim edəcəyi qeyd olunur. Nəşrlərdə həmçinin WUF13-ün qlobal liderləri, investorları və şəhərsalma üzrə mütəxəssisləri bir araya gətirən platforma kimi beynəlxalq əhəmiyyəti vurğulanır. Bundan əlavə, məmnuniyyətlə qeyd olunur ki, Azərbaycan bu mötəbər tədbirə uğurla ev sahibliyi edir və Pakistan nümayəndə heyəti Bakıda böyük qonaqpərvərliklə qarşılanıb.

Çinin Sinxua Xəbər Agentliyi də Azərbaycanın dəstəyi ilə keçirilən WUF13 haqqında bir sıra məqalələr dərc edib. Məqalələrdə forumun şəhərsalma, əlverişli mənzil və davamlı şəhərsalma üçün vacib qlobal platforma olduğu qeyd olunur. Orada vurğulanır ki, Bakı tədbirə yüksək səviyyədə hazırlaşıb, müasir infrastrukturun, yaşıl məkanların, tarixi və mədəni irsin ahəngdar birləşməsini nümayiş etdirib. Oxuculara həmçinin Azərbaycanın davamlı şəhərsalmada uğurlu bir model yaratdığı fikri təqdim olunur. Bundan əlavə, məqalələrdə Çin mütəxəssislərinin fikirləri də yer alır. Onlar Çinin şəhərsalma və əlverişli mənzil sahəsindəki təcrübəsinin Azərbaycan və digər inkişaf etməkdə olan ölkələr üçün faydalı bir nümunə ola biləcəyinə və WUF13-ün uzunmüddətli şəhər yenilənməsi və beynəlxalq əməkdaşlığın gücləndirilməsi baxımından Bakı üçün böyük əhəmiyyət kəsb etdiyinə inanırlar.

Rusdilli nəşrlər də WUF13-ə bir sıra məqalələr həsr ediblər. Moscow-baku.ru, Vestnik Kavkaza və digər media orqanları qeyd ediblər ki, Azərbaycan hökuməti və BMT-Habitat tərəfindən birgə təşkil edilən tədbirə 180-dən çox ölkədən 40.000-dən çox iştirakçı qeydiyyatdan keçib. Sessiyanın ilk dəfə olaraq Nazirlər Görüşü və Liderlər Zirvəsinin seqmentlərini əhatə etdiyi vurğulandı. Nəşrlərdə bildirilirdi ki, Bakıdakı əsas müzakirələr əlverişli mənzil, davamlı şəhərləşmə, iqlim dəyişikliyinə davamlılıq və ağıllı şəhər modellərinə yönəlib. Azərbaycan həmçinin Qarabağ və Şərqi Zəngəzurda yenidənqurma layihələrini beynəlxalq ictimaiyyətə təqdim etdi, eləcə də "yaşıl enerji zonası" yaratmaq təşəbbüslərini irəli sürdü.

Fransız dilində nəşr olunan Lagazetteaz.fr BMT-Habitat İcraçı Direktoru Ana-Klaudia Rossbaxın WUF13 ilə bağlı fikirləri barədə məlumat verdi. Məqalədə tədbirin şəhərsalma gündəliyində əsas beynəlxalq platforma rolunu oynadığı qeyd edildi. Həmçinin, yüksək səviyyəli foruma ev sahibliyi edən Bakının şəhərsalma, davamlı inkişaf və "Hamı üçün mənzil" mövzusu üzrə qlobal müzakirələr üçün əsas platformaya çevrildiyi vurğulanır. Həmçinin qeyd olunur ki, WUF13 "Yeni Şəhərsalma Gündəliyi" ətrafında siyasi konsensus yaratmağı və nazirlər görüşləri və digər formatlar vasitəsilə qarşıdakı onillik üçün prioritetləri müəyyən etməyi hədəfləyir.

Misir mətbuatı da WUF13-ə geniş diqqət yetirib. “The Egyptian Gazette”, “Youm7”, “El Balad”, “Vetogate”, “Al Dostor”, “Al-Usbua”, “Al Qarar Al Arabi”, “Business News Egypt”, “Anbaa Alyoum”, “Nile.eg” və digər media orqanlarında dərc olunmuş məqalələrdə qeyd olunur ki, Azərbaycan və BMT-Habitat tərəfindən birgə təşkil edilən WUF13 şəhər inkişafı, davamlı inkişaf və əlverişli mənzil mövzularında qlobal müzakirələr üçün əsas platformadır. Vurğulanır ki, Bakı tərəfindən yüksək səviyyədə keçirilən bu mühüm tədbir “Yeni Şəhər Gündəliyi” ətrafında qlobal siyasi və strateji dialoq üçün əhəmiyyətli beynəlxalq platformaya çevrilib. Nəşrlərdə həmçinin Misirin sessiyada şəhər inkişafı təcrübəsini, xüsusən də əlverişli mənzil sahəsindəki nailiyyətlərini beynəlxalq auditoriya ilə bölüşdüyü bildirilir.

Özbəkistanın Kun.uz, ​​​​Podrobno.uz, UzDaily, UZA, Gazeta.uz və Zamin.uz nəşrləri WUF13-ü qlobal urbanizasiya, davamlı inkişaf, sosial həyat və mənzil məsələlərinin müzakirəsi üçün nüfuzlu beynəlxalq platforma kimi təqdim edir. Onlar həmçinin vurğulayırlar ki, Bakının yüksək səviyyədə ev sahibliyi etdiyi tədbir BMT çərçivəsində əməkdaşlıq və şəhərsalma həllərinin müzakirəsi üçün vacib qlobal platformadır. Nəşrlər Özbəkistan Prezidenti Şavkat Mirziyoyevin Bakıya işgüzar səfərini və forumda iştirakını Özbəkistanın beynəlxalq şəhərsalma gündəliyində fəal mövqeyini nümayiş etdirən əhəmiyyətli bir hadisə kimi qiymətləndirirlər.

Malayziyanın Bernama xəbər agentliyi, eləcə də The Sun və SABA News WUF13-ün qlobal urbanizasiya və davamlı şəhərsalma üçün əsas platformalardan biri kimi beynəlxalq şəhərsalma gündəliyinin formalaşdırılmasında mühüm dialoq məkanı kimi xidmət etdiyini vurğulayırlar. Qeyd olunur ki, Malayziya bu sahədə genişləndirilmiş əməkdaşlığı və sessiya zamanı müzakirə edilən qlobal şəhərsalma təşəbbüslərini dəstəkləyir.

Keniya media qurumları Saccoreview, People Daily, The-star.co.ke, Capitalfm, Kenyans.co.ke, Kenyafrontline.com və Standardmedia.co.ke bildiriblər ki, Prezident Uilyam Rutonun WUF13-ə Keniyanın əlverişli mənzil və davamlı şəhər inkişafı sahəsindəki nailiyyətlərinə görə dəvət olunması barədə məlumat verib. Forum zamanı Prezident Ruto Keniya hökumətinin əlverişli mənzil proqramını təqdim edəcək və şəhər layihələrinə yeni beynəlxalq tərəfdaşlar və investorlar cəlb etməyə çalışacaq. Nəşrlərdə həmçinin Keniya dövlət başçısı ilə Azərbaycan Prezidenti arasında keçirilən görüş də işıqlandırılıb.

WUF13 xəbərləri Türkiyə, Səudiyyə Ərəbistanı, Birləşmiş Ərəb Əmirlikləri, Qazaxıstan, Tacikistan, Hindistan, İordaniya, İraq, Mozambik və digər ölkələrin media qurumları tərəfindən də geniş işıqlandırılıb.