Tanınmış yazıçı Nüşabə Məmmədlinin “Zəfər zənguləsi” növbəti dəfə “Kitablar səltənətinin inciləri”ndə

Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) M,Ş.Vazeh adına Mərkəzi Kitabxanasında “Azərbaycan Mədəniyyəti – 2040” Mədəniyyət Konsepsiyasının icrası ilə əlaqədar həyata keçirilən “Kitablar səltənətinin inciləri” adlı mütaliə silsiləsindən izləyicilərə Mərkəzi Kitabxananın Fəxri oxucusu, yazıçı Nüşabə Məmmədlinin böyük Zəfərimizə həsr olunan “Zəfər zənguləsi” romanının “Yeriyən ağaclar” bölməsindən kiçik bir hissə təqdim olunur.

Azərbaycan ədəbiyyatında özünəməxsus yeri olan AYB-nin və AJB-nin üzvü, “Azərbaycan Yazıçı Qadınlar Cəmiyyəti” İctimai Birliyinin sədri, çoxsaylı esse, mənsur şeir, lətifə, hekayə, oçerk, pritça, rəvayət və povestlərin, irihəcmli romanların müəllifi kimi tanınan yazıçı Nüşabə xanım Məmmədlinin əsərlərinin əksəriyyəti Qarabağa, şəhidlərə, qaçqınlara və əsir düşmüş insanların həyatına həsr olunmuşdur. Qarabağın əsir düşmüş qadınlarından bəhs edən “Zəngulə” romanı bir sıra mükafatlara layiq görülmüşdür. Bu əsər 2005-ci ildə “İlin kitabı” elan olunmuşdur. 
44 günlük Vətən müharibəsində şanlı Qələbə qazanan xalqımız bu yolda şəhidlər verdi. Qanlı döyüşlərdə sağlamlığına ciddi xəsarət dəyən cəsur oğullarımızın Vətəni nəhayət ki, murdar yağıdan təmizləndi. Onlar Vətənə alnıaçıq, üzüağ döndülər. Nüşabə Məmmədli real hadisələrə əsaslanaraq “Zəfər zənguləsi” romanını yazdı. Əsəri oxuduqca, mənfur düşmənin iç üzünü daha da tanıdıq. Ağlagəlməz və alçaq döyüş taktikaları, əsir düşən insanlara verilən misli görünməmiş işgəncələri yazıçı o qədər düzgün, təsirli və aydın qələmə almışdır ki, insanın damarlarında qan donur. Əsgər və zabitlərin Vətənə, xalqa sədaqəti və döyüş meydanında bir-birinə olan səmimi dostluğu da romanda öz əksini tapmışdır. 
Romanın “Yeriyən ağaclar” bölməsində ayıq-sayıq igid döyüşçü Əli sürətlə yeriyən ağacları cəsarətli Əmraha göstərir. Süni külək effekti ilə düşmənlər üstlərindəki kamuflyajın yarpaqlarını tərpədərək yeriyən ağaclarla sürətlə irəliləyirdilər. Amma erməni vandalları onları nə gözlədiyini bilmirdilər...  
Bu kiçik epizod tanınmış yazıçı Nüşabə Məmmədlinin “Zəfər zənguləsi” romanındandır. Real hadisələrdən bəhs edən bu əsərdə qəhrəmanlıq və şücaət göstərmiş döyüşçülərimizin böyük Qələbəmizə, şanlı Zəfərimizə gedən yoldakı qəhrəmanlıqları ilə daha yaxından tanış oluruq. 

Yazıçı Şahzadə İldırımın səsləndirdiyi kiçik hissə kitabxananın YouTube kanalında izləyicilərə təqdim olunur: