BƏƏ süni intellekt tərəfindən idarə olunacaq

Birləşmiş Ərəb Əmirlikləri (BƏƏ) iki il ərzində dövlət xidmətlərinin və əməliyyatlarının 50%-ə qədərini muxtar süni intellekt (Sİ) sistemlərinə keçirmək niyyətindədir.

Təşəbbüs ölkə prezidenti Məhəmməd bin Zayed Əl Nəhyanın tapşırığı ilə həyata keçirilir və genişmiqyaslı dövlət idarəçiliyi islahatının bir hissəsidir.

Planları vitse-prezident, baş nazir və Dubay hökmdarı Məhəmməd bin Rəşid Əl Məktum açıqlayıb və sözdə "agent əsaslı" Sİ sistemlərinə əsaslanan yeni idarəetmə modelinin yaradılmasını vurğulayıb. O bildirib ki, bu cür texnologiyalar insan müdaxiləsi olmadan tapşırıqları müstəqil şəkildə yerinə yetirməyə, prosesləri idarə etməyə və qərar qəbuletmədə iştirak etməyə qadirdir.

"Qabaqcıl Sİ ​​sistemləri artıq insan müdaxiləsi olmadan dəyişiklikləri izləməyə, təhlil aparmağa, tövsiyələr verməyə və hərəkət ardıcıllığını yerinə yetirməyə qadirdir." O, X (Twitter)-də bildirib ki, "Sİ hökumətin icraçı tərəfdaşı olacaq, qərarların qəbul edilməsinə, xidmət keyfiyyətinin və əməliyyat səmərəliliyinin artırılmasına, nəticələrin qiymətləndirilməsinə və təkmilləşdirmələrin real vaxt rejimində tətbiq olunmasına kömək edəcək".

İslahat çərçivəsində nazirlərin və departament rəhbərlərinin fəaliyyəti yeni standartların tətbiqi və işlərində süni intellektdən istifadə sürətinə əsasən qiymətləndiriləcək. Bütün federal hökumət işçiləri süni intellekt bacarıqlarını inkişaf etdirməyə yönəlmiş ixtisaslaşmış təlim keçəcəklər. Hökumət proqramın dünyada ən böyük dövlət idarəçiliyi transformasiyalarından biri olacağını gözləyir.

Digərləri ilə yanaşı, Telegram-ın baş direktoru Pavel Durov da Məhəmməd bin Rəşid Əl Maktumun paylaşımına münasibət bildirərək qərarı "möhtəşəm" adlandırıb.

O əlavə edib ki, "BƏƏ məğlubedilməz hala gəlir".