Səudiyyə Ərəbistanı Liqası Ronaldonun boykotuna cavab verdi

Səudiyyə Ərəbistanı Liqası komandanın son oyunlarını və məşqlərini buraxan "Əl-Nəsr"in hücumçusu Kriştiano Ronaldo ilə bağlı vəziyyətə münasibət bildirib.

Liqa nümayəndəsi portuqaliyalı futbolçunun klubların transfer və idarəetmə siyasətinə təsir göstərdiyinə dair hər hansı bir iddianı təkzib edib. Bəyanatda qeyd olunub ki, hər bir liqa iştirakçısı müstəqil və eyni qaydalar çərçivəsində fəaliyyət göstərir. "Səudiyyə Ərəbistanı Liqası sadə bir prinsip üzərində qurulub: hər bir klub eyni qaydalar çərçivəsində müstəqil fəaliyyət göstərir. Klubların öz direktorlar şurası və rəhbərliyi var və onlar davamlılığı və rəqabət balansını təmin edən maliyyə çərçivəsində kadr, xərclər və strategiya ilə bağlı qərarlar qəbul edirlər", - deyə bəyanatda bildirilir.

Liqada vurğulanıb ki, Ronaldo transferindən bəri "Əl-Nəsr" layihəsi ilə tam şəkildə məşğul olub və klubun inkişafına töhfə verib, lakin onun rolu komandadan kənara çıxmır. "Kriştiano, hər hansı bir elit oyunçu kimi, qalib gəlmək istəyir. Amma nə qədər vacib olsa da, heç kim öz klubundan kənarda qərar verə bilməz", - liqa nümayəndəsi bildirib.

O, həmçinin qeyd edib ki, komandaların son transfer fəaliyyətləri onların müstəqilliyini təsdiqləyir. Liqa vurğulayıb ki, "Bir klub müəyyən bir şəkildə güclənib, digəri isə fərqli bir yanaşma seçib. Bunlar klubların özləri tərəfindən təsdiq edilmiş maliyyə parametrləri çərçivəsində qəbul edilmiş qərarlar idi".

Sonda liqa nümayəndələri titul uğrunda mübarizənin gərgin olduğunu və əsas diqqətin futbola və komandalar arasında ədalətli rəqabətə yönəldiyini vurğulayıblar.