Kitabxanada akademik Yusif Məmmədəliyevin 120 illik yubileyi qeyd olundu +FOTO=8

Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanasında böyük kimyaçı-alim, akademik Yusif Məmmədəliyevin 120 illik yubileyinə  həsr olunmuş “Yusuf Məmmədəliyev: Odlar yurdunun fəxri” adlı yubiley tədbir keçirildi. 

Yasamal rayon MKS-inin direktoru, tarix üzrə fəlsəfə doktoru, Fəxri mədəniyyət işçisi Lətifə Məmmədova Azərbaycanda neft kimyasının memarı olan kimyaçı-alim, akademik Yusif Məmmədəliyevin tədqiqatlarının SSRİ məkanında və  dünyada böyük əks-səda doğurduğunu bildirdi. Yusif Məmmədəliyevin tarixə qızıl hərflərlə yazılan ixtiralarından, onun rəhbərliyi ilə Azərbaycanda güclü neft kimya məktəbinin formalaşmasından, onun əldə etdiyi elmi nailiyyətlərin müasir kimya sənayesinin inkişafına təkan verməsindən geniş məlumat verdi. L.Məmmədova qeyd etdi ki, dahi alim Azərbaycan elminin böyük təşkilatçısı olmuşdur. Onun təşəbbüsü ilə Elmlər Akademiyasının yeni binası inşa edilmiş, Şərqşünaslıq İnstitutu, Əlyazmalar Fondu, Şamaxı Rəsədxanası yaradılmışdır. Ədəbiyyatda nizamişünaslıq istiqaməti inkişaf etməyə başlamış, “Kitabi-Dədə Qorqud” dastanının ölkəmizdə dərindən öyrənilməsi və Qobustanda arxeoloji qazıntılar aparılması haqqında təşəbbüslər irəli sürmüşdür.

Tədbirdə çıxış edən 225№-li tam orta məktəbin təlim-tərbiyə işləri üzrə direktor müavini, M.Ş.Vazeh adına Mərkəzi Kitabxananın Fəxri oxucusu, yazıçı, şair, məktəbin nəzdində Kiçik Akademiyanın rəhbəri Zenfira Nusalova tədbirin təşkilinə görə Lətifə Məmmədovaya təşəkkürün bildirdi və qeyd etdi ki, bəzi insanların adı daşlara bəzilərinin adı isə tarixə yazılır Yusuf Məmmədəliyev məhz adı tarixə qızıl hərflərlə yazılan şəxsiyyətlərdəndir. 

158№-li tam orta məktəbin kimya müəllimi Gülçin Şıxməmmədova qeyd etdi ki, kimyaçı-alim Yusuf Məmmədəliyevin böyük ixtiraları Azərbaycanın neft kimyası sənayesində inqilab etmişdir. Onun  xidmətləri unudulmur və bu gün də, gələcəkdə də gənc nəsillərə aşılanacaq. 

M.Ş.Vazeh adına Mərkəzi Kitabxananın Fəxri  oxucu, Dünya Azərbaycanlı Yazarlar Qurumunun üzvü, yazıçı Şahzadə İldırım tədbirdə iştirakından böyük məmnunluq duyduğunu bildirdi və Yusuf Məmmədəliyev haqqında heç yerdə olmayan məlumatlar əldə etdiyi üçün tədbir təşkilatçılarına təşəkkürünü bildirdi. 

M.Ş.Vazeh adına Mərkəzi Kitabxananın Fəxri oxucusu, tərcüməçi, şair, publisist Zeynəb Cəmaləddin çıxışında belə tədbirlərin əhəmiyyətindən, uşaqların daha çox maarifləndirilməsində və kimya elminə marağının artırılmasında böyük əhəmiyyət kəsb etdiyini vurğuladı.
Azərbaycandakı Rus İcmasının sədr müavini Lyubov Yakunina bu maraqlı tədbirdə iştirak edənlərə təşəkkür etdi və bildirdi ki, istedadlı alim və tədqiqatçının həyatı gənclərin bu sahəyə marağını artırır. 

Tədbirin bədii hissəsində 225№-li tam orta məktəbin nəzdində fəaliyyət göstərən Kiçik Akademiyanın üzvləri 7-ci, 8-ci və 10-cu sinif şagirdləri Nazlı Xasiyeva, Leyla Cəfərova, Murad Məmmədli, Mədinə Mirzəzadə, Mövlan Əlizadə, Zəhra  Fərəcova, Aylin Səfərli, Mədinə Məmmədəliyeva, Elena Əbdürrəhmanova akademik Yusuf Məmmədəliyevə həsr olunmuş şeirlər səsləndirdilər. 7-ci sinif şagirdi Mikayıl Qasımlı dəm qazından qorunmaq üçün ixtira etdiyi  “Ağıllı ev sistemi”ni tədbir iştirakçılarına təqdim etdi. Layihə tədbir iştirakçıları tərəfindən maraqla qarşılandı. 

Tədbirdə Mərkəzi Kitabxananın hazırladığı akademik Yusuf Məmmədəliyevin 120 illik yubileyinə həsr olunmuş “Elmə həsr olunmuş ömür”, “Tarixə yazılan ömür” habelə 158№-li tam orta məktəbin 9-cu sinif şagirdləri  Zəhra Rəcəbova, Zəhra Tağıyeva, Ayan Kərimli və Məryəm Hüseynova hazırladıqları “Akademik Yusuf Məmmədəliyev – 120” adlı videoçarxlar nümayiş olundu.