Kişilər atalıq məzuniyyətinə çıxa biləcəklər

Kişilərə uşağın doğulması ilə əlaqədar ödənişli məzuniyyət verilməsi imkanları nəzərdən keçirilir.

Beynəlxalq Əmək Təşkilatının (BƏT) tələblərinə uyğun olaraq ölkənin Əmək Məcəlləsinə bir sıra düzəlişlər təklif olunur.

Dəyişikliklər layihəsi Milli Məclisin Regional Məsələlər Komitəsinin bu gün keçirilən iclasında müzakirə olunub.

Qeyd edilib ki, Azərbaycan tərəfindən ratifikasiya edilmiş BƏT konvensiyalarına uyğun olaraq, Əmək Məcəlləsində artıq "ailə məsuliyyəti olan işçi" və "minimum əmək haqqı" anlayışları mövcuddur.

Həmçinin, BƏT-in 165 saylı Tövsiyəsinə uyğun olaraq Əmək Məcəlləsinin 94-cü maddəsinin yenidən işlənməsi təklif olunur. Dəyişikliyə əsasən, boş vəzifə (peşə) yarandıqda və əvvəllər yarımştat iş yerinin dəyişdirilməsinə səbəb olan hallar yarandıqda, işəgötürən yarımştat işçinin tam məşğulluğunu təmin etmək üçün tədbirlər görməyə borcludur.

Analığın Mühafizəsi Konvensiyasının tələblərinə uyğun olaraq, Əmək Məcəlləsinə yeni bir bölmə əlavə olunur. Bu düzəlişdə ödənişli analıq məzuniyyətinin doğuşdan əvvəlki hissəsinin müddətinin hamiləliyin başlanğıcından uşağın doğuşu qədər keçən günlərin sayına qədər artırılması təklif olunur. Lakin məzuniyyətin doğuşdan sonrakı hissəsi azaldılmır.

Həmçinin, uşağın doğulması ilə əlaqədar olaraq, kişilərə tibb müəssisəsinin arayışı əsasında doğuşdan əvvəlki və doğuşdan sonrakı dövrlərdə ümumilikdə 14 təqvim günü ödənişli məzuniyyət verilir.