“Sitrus, çay və çiyələk əkini ilə bağlı görülmüş işlər və qarşıda duran vəzifələr” - Masallıda zona müşavirəsi 

Son illər ölkəmizdə kənd təsərrüfatının inkişafına göstərilən dövlət dəstəyi digər bölgələrdə olduğu kimi, Masallıda da sitrus meyvəçiliyinin inkişafında yüksək nəticələr əldə etməyə imkan yaradıb. Ənənəvi əkinçiliyə üstünlük verilməsi sahibkarları ruhlandırıb. 
Noyabrın 19-da,  Masallıda keçirilən “Sitrus, çay və çiyələk əkini ilə bağlı görülmüş işlər və qarşıda duran vəzifələr” mövzusundakı zona müşavirəsində bu barədə geniş danışılb.
“AZpress.AZ” İnformasiya Agentliyinin xüsusi müxbiri Akif Ağayev xəbər verir ki, Mahmudavar kəndində təşkil olunan müşavirə öncəsi iştirakçılar “Baba Bulağı” MMC-yə məxsus meyvəqurutma sexinə, yeni yaradılmış, sutkalıq gücü 1,5 ton olan mini çay fabrikinə, eləcə də rayonda istehsal olunan kənd təsərrüfatı məhsulları guşəsinə baxış keçiriblər.
Sonra müşavirəni giriş sözü ilə açan Masallı Rayon İcra Hakmiyyətinin başçısı Araz Əhmədov bildirib ki, Respublika Prezidentinin 2016-cı il 6 dekabr tarixli 1138 nömrəli Fərmanı ilə Azərbaycanda kənd təsərrüfatı məhsullarının istehsalına və emalına dair Strateji Yol Xəritəsində ölkənin kənd təsərrüfatı sahəsinin inkişafı ilə bağlı 2020-ci ilədək strateji baxış, 2025-ci ilədək olan dövr üçün uzunmüddətli baxış və 2025-ci ildən sonrakı dövr üçün hədəf baxış əks olunub ki, bu da kənd təsərrüfatı sahəsində həm orta, həm də uzunmüddətli dövr üzrə strateji inkişaf hədəflərinə çatmaq üçün dövlətin ardıcıl mərhələlərlə icra ediləcək aydın yol xəritəsinə malik olmasını ifadə edir. 
Ölkədə qeyri-neft sektorunun inkişafı istiqamətində görülən işlər və qəbul edilən qərarlardan danışan RİH başçısı respublikada kənd təsərrüfatı məhsulları istehsalçılarının texnika ilə təminatının yaxşılaşdırılması, fermerlərə güzəştli şərtlərlə aqrotexniki xidmətlər göstərilməsi, kənd təsərrüfatı texnikasının, texnoloji avadanlığın, suvarma sistemləri avadanlığının güzəştli şərtlərlə satışı, krediti və lizinqinin maliyyələşdirilməsi istiqamətində mühüm işlər görüldüyünü diqqətə çatdırıb. O, vurğulayıb ki, ğlkəmizdə məhsul istehsalçılarına göstərilən dövlət dəstəyi aqrar bölmənin digər sahələri kimi, sitrus meyvəçiliyi, çay və çəltikçiliyin inkişafı üçün də geniş imkanlar yaradıb. Kənd təsərrüfatının bu sahəsinin inkişafına son illərdə dövlət tərəfindən ciddi diqqət yetirilməsi idxaldan asılılığı azaltmaq baxımından mühüm əhəmiyyət daşıyır.
Masallı Dövlət Aqrar İnkişaf Mərkəzinin direktoru Seymur Nuriyev çıxışında qeyd edib ki, rayonda kənd təsərrüfatına yararlı 32519 ha torpaq sahəsinin 26722 hektarı xüsusi mülkiyyətə verilmiş pay torpaqları təşkil edir. Torpaqları 24907 ha əkin kateqoriyasıda olan torpaq sahəsidir ki, bunun da 10197 ha suvarılan torpaq sahələridir...
Masallı Su Meliorasiya Sistemlərinin İstismarı İdarəsinin rəisi Akif Həmidov məlumat verib ki, rayon ərazisində 10131 ha əkin sahələrinin suvarma suyuna olan tələbatı Viləşçay su anbarı, Babaser su anbarı, sututarlar və artezian quyuları vasitəsilə təmin olunur. Suyun itkisiz və maneəsiz tələbatçılara çatdırılmasından ötrü Xırmandalı, Həsənli, Köçəkli, Qarğalıq, Xıl, Gəyəçöl, Boradigah, Babaser və digər kəndlərində olan suvarma kanallarında lildən təmizlənmə, sahilbərkitmə işləri görülüb və davam etdirilir. 
“Baba bulağı” MMC-nin rəhbəri Zəmanə Babayeva-Cəfərzadə, icraçı direktoru Əfqan Babayev, sahibkarlar Seyran Muradov, Fikrət Məmmədov çıxışlarında sitrus meyvəçiliyi, çay və çiyələk istehsalının artırılması ilə bağlı fikir və təkliflərini səsləndirib, onlara göstərilən diqqət və qayğıya görə Prezident İlham Əliyevə dərin minnətdarlıqlarını bildiriblər.
Çıxışlarda kənd təsərrüfatında özünəməxsus yeri olan sitrus meyvə bitkilərinin becərilməsi üçün Masallıda əlverişli təbii iqlim şəraitinin və ənənələrin mövcudluğu, bu sahənin yüksək iqtisadi səmərəliliyə və ixrac potensialına malik olması ilə sitrusçuluğun inkişaf etdirilməsininin zəruriliyi gündəmə gətirilib.    
Müşavirənin əhəmiyyətindən bəhs edən rayon rəhbəri çay, çiyələk və sitrus meyvələrinin istehsalının inkişafı, eləcə də yeni kənd  təsərrüfatı məhsulları emal edən müəssisələrinin fəaliyyəti istiqamətində görüləcək işlərin Masallıda aqrar sektorun inkişafına, yeni iş yerlərinin açılmasına töhfə verəcəyinə əminliyini bildirib.
Müşavirə fermer və torpaq mülkiyyətçilərini maraqlandıran sualların cavablandırılması ilə yekunlaşıb.