Səssiz gedişinlə sükut çökdü, Şahin müəllim...

Təkcə dünən axşam danışmadıq... Son bir ayda demək olar ki, günaşırı əlaqə saxlayırdıq. Hər dəfə səsi telefonda eşidiləndə sakit, düşüncəli tonu ilə hal-əhval tutur, yeni layihələrdən, regionlarda görüləcək işlərdən danışırdı. Səhhəti ilə maraqlananda deyirdi ki, təzyiq bir az narahat edir, amma müalicə alır. Həmişəki kimi nikbin idi, planlarından, görüşlərdən bəhs edirdi.
Noyabrın 28-də AJB-də görüşəcəkdik. “Elçin müəllim sizi görmək istəyir, son tədbirləriniz diqqətini cəlb edib,” – demişdi. Heç kimin ağlına gəlməzdi ki, bu, son söhbətimiz olacaq...
Bu gün səhər aldığım qəfil, ağır xəbər məni dərindən sarsıtdı. İndi də inana bilmirəm. Sanki bir zənglə yenə səsini eşidəcəyəm kimi gəlir.
Əsl ziyalı, səmimi insan, yüksək mədəniyyət sahibi və peşəkar jurnalist Şahin Babayevin bu dünyadan köçməsi təkcə media camiəsi üçün deyil, onu tanıyan hər kəs üçün böyük itkidir. Azərbaycan Jurnalistlər Birliyinin sədr müavini kimi o, hər zaman həmkarlarına dayaq olur, onların yanında dayanırdı. Sakit, dərin düşüncəli və alicənab davranışı ilə seçilirdi.
Biz 11 il əvvəl tanış olmuşduq – hörmətli həmkarım, qocaman jurnalist Həsənağa Əliyevin vasitəsilə. O gündən etibarən münasibətimiz həm peşə, həm də dostluq səviyyəsində möhkəmləndi. Tez-tez Masallıya gələr, tədbirlərimizdə iştirak edərdi. Hər zaman sakit, təmkinli, alicənab davranışı, dərin intellekti, səmimi münasibəti ilə seçilirdi. Onunla söhbət etmək həm öyrədici, həm də xoş idi.
Bu səssiz gedişinlə bir boşluq yarandı, Şahin müəllim. Səni tanıyanların qəlbində sükut çökdü. Amma sənin adın, işıqlı xatirən unudulmayacaq.
Sən həmkarlarının, dostlarının yaddaşında həmişə kübar davranışın, insaniliyin, təvazökar təbəssümün, mülayim səsin və ziyalı duruşunla qalacaqsan. Yoxluğun aramızda böyük boşluq yaradacaq, yerin daim görünəcək.
Öz adımdan və AJB Masallı rayon təşkilatının üzvləri adından 61 yaşında haqq dünyasına qovuşan Şahin Ənvər oğlu Babayevin vəfatı ilə bağlı mərhumun ailəsinə, yaxınlarına və bütün media ictimaiyyətinə dərin hüznlə başsağlığı veririk.

Akif AĞAYEV,
AJB Masallı rayon təşkilatının sədri