Masallıda Beynəlxalq Müəllimlər Günü qeyd olunub

Masallı rayonunda 5 Oktyabr – Beynəlxalq Müəllimlər Günü münasibətilə “Mən yer üzündə müəllimdən yüksək ad tanımıram” mövzusunda tədbir keçirilib.
Tədbirdə çıxış edən Masallı Rayon İcra Hakimiyyətinin başçısı Araz Əhmədov müəllim əməyinin cəmiyyət üçün xüsusi əhəmiyyət daşıdığını vurğulayıb. O bildirib ki, bu əlamətdar gün UNESCO-nun qərarı ilə 1966-cı ildən qeyd olunur, Azərbaycanda isə 1993-cü ildən etibarən rəsmi şəkildə qeyd edilməyə başlanıb.
Araz Əhmədov çıxışında ümummilli lider Heydər Əliyevin “Mən yer üzündə müəllimdən yüksək ad tanımıram” fikrini xatırladaraq, onun müəllim əməyinə verdiyi yüksək qiyməti, təhsilə və təhsil işçilərinə göstərdiyi diqqəti xüsusi vurğulayıb. Həmçinin Prezident İlham Əliyevin rəhbərliyi ilə təhsilin inkişafına yönəlmiş islahatların və müəllimlərə göstərilən qayğının davamlı xarakter aldığını bildirib.
Çıxışlar zamanı Vətən müharibəsində iştirak etmiş 15 masallılı müəllimin igidliyi də xüsusi qeyd olunub.
Lənkəran-Astara Regional Təhsil İdarəsinin Masallı sektoru müdiri Elman Rzayev də tədbirdə çıxış edərək, ölkədə təhsil sahəsində aparılan islahatlardan və müəllimlərin sosial rifahının yaxşılaşdırılması istiqamətində görülən işlərdən bəhs edib.
Tədbirin sonunda bir qrup fəal müəllim Masallı Rayon İcra Hakimiyyəti başçısının Fəxri Fərmanı ilə təltif olunub.

Akif AĞAYEV