Masallıda müşavirə keçirilib

Masallı Rayon İcra Hakimiyyətinin təşkilatçılığı ilə “Tərəvəz və çəltik əkin sahələrində görülmüş işlər və qarşıda duran vəzifələr” mövzusunda müşavirə keçirilib.
Avqustun 27-də, Qızılağac kəndindəki müşavirədə rayon icra hakimiyyətinin başçısı Araz Əhmədov, aparatın məsul əməkdaşları, aidiyyəti üzrə rayon idarə, müəssisə, təşkilat rəhbərləri, media nümayəndələri və kənd sakinləri iştirak ediblər.
Əvvəlcə kənd təsərrüfatı məhsullarından hazırlanmış güşəyə baxış olub.
Sonra müşavirəni giriş nitqi ilə açan Masallı Rayon İcra Hakimiyyətinin başçısı Araz Əhmədov bildirib ki, ölkə Prezidentinin müvafiq fərmanı ilə respublikada kənd təsərrüfatı məhsullarının istehsalına və emalına dair hazırlanan Strateji Yol Xəritəsində 2020-ci ilədək strateji baxış, 2025-ci ilədək olan dövr üçün uzunmüddətli baxış və 2025-ci ildən sonrakı dövr üçün hədəf baxış əks olunub ki, bu da kənd təsərrüfatı sahəsində həm orta, həm də uzunmüddətli dövr üzrə strateji inkişaf hədəflərinə çatmaq üçün dövlətin ardıcıl mərhələlərlə icra ediləcək aydın yol xəritəsinə malik olmasını ifadə edir: “Ölkəmizdə qeyri-neft sektorunun inkişafı istiqamətində davamlı işlər görülür və qərarlar qəbul edilir. Buna misal olaraq ölkədə kənd təsərrüfatı məhsulları istehsalçılarının texnika ilə təminatının yaxşılaşdırılması, fermerlərə güzəştli şərtlərlə aqrotexniki xidmətlər göstərilməsi, kənd təsərrüfatı texnikasının, texnoloji avadanlığın, suvarma sistemləri avadanlığının güzəştli şərtlərlə satışı, krediti və lizinqinin maliyyələşdirilməsi, həmçinin fermerlərin sertifikatlı, o cümlədən keyfiyyətli və məhsuldar toxumlarla təmin edilməsi istiqamətində mühüm işlər görülmüşdür...”
Masallı DAİM direktoru Seymur Nuriyev, Aqroservis ASC-nin Masallı-Yardımlı rayon bölməsinin rəhbəri Hikmət Xəlilov, Masallı Su Meliorasiya Sistemlərinin İstismarı İdarəsinin rəisi Akif Həmidov, fermerlər Mərifət Bağırov, İlqar Məmmədov, Siyavuş Nəzərov, Göydəniz Məmmədov və başqaları rayonda tərəvəz və çəltik əkin sahələrində görülmüş işlər və qarşıda duran vəzifələr barədə çıxış ediblər. 
Müşavirəni yekunlaşdıran RİH başçısı Araz Əhmədov aidiyyatı qurum rəhbərlərinə görüləcək işlərin gücləndirilməsi, eləcə də qaldırılan məsələlərlə bağlı müvafiq tapşırıq və tövsiyələrini verib. 

Akif AĞAYEV