Ukrayna dünya çempionatında iştirakdan imtina edib

Ukrayna Cüdo Federasiyası 2025-ci ildə keçiriləcək Dünya Çempionatında Belarusun dövlət bayrağı və himni ilə çıxış edən idmançılarının turnirə buraxılması ilə əlaqədar iştirakdan imtina etdiyini açıqlayıb.

Bu barədə qurumun Telegram kanalında məlumat dərc olunub.

“Mayın 16-da Belarus Respublikası Milli Olimpiya Komitəsinin rəsmi saytında Beynəlxalq Cüdo Federasiyasının (IJF) İcraiyyə Komitəsinin qərarı ilə bağlı məlumat dərc edilib ki, bu qərara əsasən, 2025-ci il iyunun 1-dən Belarus idmançılarına bütün beynəlxalq yarışlarda iştiraka icazə verilir.

Buna cavab olaraq, Ukrayna Cüdo Federasiyası rəsmi olaraq Beynəlxalq Cüdo Federasiyası ilə əlaqə saxlayıb, bu məlumatı təsdiq və ya təkzib etmək istəyib. Mayın 23-də Ukrayna Cüdo Federasiyası İcraiyyə Komitəsinin qərarını təsdiqləyən IJF-dən rəsmi cavab alıb. Xüsusilə qeyd olunub ki, “IJF idmanın dialoq, birlik və anlaşma platforması kimi xidmət etməsini təmin etməyə – divarlar deyil, körpülər tikməyə həsr olunub”.

Bununla əlaqədar, Ukrayna Gənclər və İdman Nazirliyinin əmrini rəhbər tutaraq, Ukrayna Cüdo Federasiyası 2025-ci il iyunun 13-dən 19-dək keçiriləcək dünya çempionatında Ukraynanın cüdo üzrə milli komandasının rəsmi nümayəndə heyətinin iştirak etməməsi ilə bağlı qərar qəbul etməyə məcburdur.

Ukrayna Cüdo Federasiyası Beynəlxalq Cüdo Federasiyasının qərarını qətiyyətlə pisləyir və bunu qlobal idman hərəkatında ədalət, məsuliyyət və həmrəyliyin əsas prinsiplərinə zidd hesab edir”, - deyə məlumatda bildirilir.