Ağcabədidə “28 May – Müstəqillik Günü” qeyd olundu

Mayın 27-də Ağcabədi Rayon İcra Hakimiyyətinin təşkilatçılığı ilə “Konstitusiya və Suverenlik İli” çərçivəsində “28 May – Müstəqillik Günü” münasibətilə tədbir keçirilib. Ü.Hacıbəyli adına Qarabağ Muğam Mərkəzinin yay zalında baş tutan tədbirdə Ağcabədi Rayon İcra Hakimiyyətinin başçısı Rafil Hüseynov, hüquq mühafizə orqanlarının, habelə idarə, müəssisə, təşkilatların rəhbərləri, şəhid ailələri, qazilər, hərbi hissə komandirləri, bir qrup əsgərlər, habelə rayon ictimaiyyəti iştirak edib. 
Tədbirin moderatoru, Ağcabədi Rayon Heydər Əliyev Mərkəzinin direktor əvəzi Ruhin Hüseynov tədbiri açıq elan etdikdən sonra Azərbaycan Respublikasının Dövlət Himni səsləndirilib. Ulu öndər Heydər Əliyevin, həmçinin torpaqlarımızın azadlığı uğrunda canından keçmiş Vətən şəhidlərinin xatirəsi bir dəqiqəlik sükutla yad olunub. 
Məruzə ilə çıxış edən Ağcabədi Rayon İcra Hakimiyyəti başçısı aparatının Sənədlərlə və Vətəndaşların müraciətləri ilə iş şöbəsinin müdiri Mərdəli Quliyev qeyd edib ki, 28 May – Müstəqillik Günü şanlı səhifəmizə qızıl hərflərlə həkk olunumuş hər bir azərbaycanlının qürur tarixidir. Bu əlamətdar gündə Azərbaycanın azadlıqsevər, tərəqqipərvər və millətsevər insanları müstəqillik elan ediblər. Belə ki, Azərbaycan xalqı müsəlman və Şərq aləmində ilk demokratik respublikanın yaradılmasına nail oldu. Bu gün də bu şanlı tarixin qeyd edilməsi Azərbaycan vətəndaşlarının öz şərəfli keçmişinəolan dərin hörmətinin təzahürüdür. 
Ağcabədi Rayon İcra Hakimiyyəti yanında İctimai Şuranın sədri Vaqif Qarayev, Daxili Qoşunların “N” saylı hərbi hissəsinin komandiri, mayor Nurlan Məmmədov, “Ağcabədi Rayon Mərkəzi Xəstəxanası” publik hüquqi şəxsin həkim-terapevti Pərvin Mərzəyeva, Vətən müharibəsi iştirakçısı, III dərəcəli əlil Cavid Allahverdiyev məruzə ətrafında çıxış edərək qeyd ediblər ki, Azərbaycan Xalq Cümhuriyyətinin qurucuları həmin vaxt ölkəmiz, xalqımız üçün böyük işlər görüblər. Onların gördüyü işlər və bu insanların əziz xatirəsi Azərbaycan xalqının qəlbində daim yaşayır. Natiqlər xüsusi fəxr hissi ilə onu da vurğulayıblar ki, bu gün bütün Azərbaycan azaddır, dövlət bayrağımız indi Vətənimizin bütün bölgələrində, o cümlədən işğaldan azad olunan müqəddəs, dədə-baba Qarabağ torpaqlarımızda dalğalanır. 

Mais İbrahimov