Bahəddin Həzi: 

Dünyaya xoş gəlmisən, əziz qardaş!

İyulun 22-də Şuşa türməsindəydim. Faiq Xudanlı mənə Sabirabaddan zəng elədi. Mənim həmin gün dərc edib paylaşdığım "Slavyan gözəlinin diktaturası" adlı essemi oxuyub zəng vurmuşdu. Biz - mən bir neçə jurnalist çox çətinliklə (sağ olsun, Vüqar Rəhimzadənin tanışları sayəsində) razılıq alıb Şuşa həbsxanasında gəzib baxırdıq. Biz dörd nəfərdik: Akif Aşırlı, mən, Vüqar Rəhimzadə özü və bir Şuşalı sürücü. Çox dəhşətli mənzərələrlə qarşılaşmışdıq. Çox da yorulmuşdum. Daxilən çox darılmışdım gördüklərimdən.

Və belə bir anda telefon zəng çalır. Salam-kəlamdan sonra ilk eşitdiyim cümlə bu olur: "Mən Sizi indiyə qədər niyə tanımamışam?!" Sonra da son essemdən çox təsirləndiyini deyir, xoş sözlər söyləyir. Vallah, o anda bu zəng bütün fiziki və mənəvi yorğunluğumu alıb aparmışdı.

Sözün düzü, elə mən də o zəngə və ondan sonra Bakıda görüşümüzə qədər Faiq qardaşımızı yaxından tanımamışdım. Tək bircə dəfə Ustad Seyran Səxavətin Beyləqanda oxucularla görüşündə rastlaşmışdıq. Tanış olmamışdıq. Faiq müəllim də regional mədəniyyət idarəsinin rəisi olaraq - görüşün təşkilatçısı kimi iştirak edirdi. Heç doğru-düzgün tanış da olmadıq. Faiq müəllim inciməsin, istər böyük vəzifəsi olsun, istər kiçik, fərq etməz, mən dövlət məmurları ilə tanışlığa, dostluğa elə də can atan deyiləm. Müxtəlif tədbirlərdə çox adam məmurlarla-filan şəkil çəkdirib paylaşır. Bu, mənə yaddır; normal baxsam da, həm də qəribə gəlir. Ona görə Faiq Xudanlı ilə də birgə şəklimiz yoxdur.

Ancaq özü şəkil kimi oğlandır. Üstəlik çox erudisiyalı, mütaliəli, çalışqan, diqqətcil, mədəni... O üzdən Mədəniyyət Nazirliyi sistemində öz yerindədir. Eyni zamanda Universitetdə dərs deyir. İnciməsin, harda işlədiyinin mənim üçün fərqi yoxdur, sözgəlişi xatırlatdım. Faiq müəllimə rəğbətim onun ədəbiyyata, sözə, sənətə sərraf gözü ilə baxıb, zərgər dəqiqliyi ilə seçim etməsinə görədir. Onun çoxlu yazıçı, şair, sənətçi dostları var, hamısı da bir-birindən talantlı, dəyərli.

Faiq müəllim kitab vurğunudur; Sabirabadda "Hophopnamə" Kitab Mərkəzi yaradıb. Dekabrın 15-də Mərkəzin açılışı oldu, məni də dəvət etmişdi. Amma Bakıda Müəllimlərin Qurultayı ilə eyni vaxta düşdü deyə gedə bilmədim. "Hophopnamə" əyalətdə ilk belə kitab mərkəzidir. Faiq Xudanlı uzun müddət, diqqətlə hazırlayırdı bu Mərkəzi. Açılışına xeyli yazıçılar, şairlər, söz ustaları və biliciləri toplaşmışdı. Çox uğurlu bir iş oldu.

Faiq Xudanlı bizim görməyə alışdığımız o sərt görkəmli, qaşları düyünlü, özündənrazı məmur obrazı deyil. Sadəcə olaraq, qardaşdır. Tanısanız, "Nə yaxşı ki tanımışam" deyəcəyiniz saf, səmimi bir kənd uşağı, Qarabağlı balasıdır, əsl Azərbaycanlıdır. Vətənsevər bir peşəkardır.

Bu gün Faiq qardaşımın dünyaya göz açdığı gündür. Dünyaya xoş gəlmisən, əziz qardaş! Xoşbəxt və sağlam yaşa! Həmişə belə qürurlu, uğurlu yaşa! Doğma el-obamız, sizin də, mənim də ata-baba yurdumuz, evimiz qalib ordumuzun gücü ilə, şəhidlərimizin mübarək qanı bahasına azad olundu. Şəhidlərimizin ruhu rahat, qazilərimizin ömrü uzun olsun! Bizim də gözümüz aydın! Ayrıca sənin yolun açıq, işlərin avand, könlün rahat olsun! Daha gözəl illər arzulayıram!

Nə yaxşı ki tanımışam!