Bu gün Milli Qəhrəman Allahverdi Bağırovun doğum günüdür

Bu gün Ağdamın "Qarabağ" futbol klubunun sabiq baş məşqçisi, Azərbaycanın Milli Qəhrəmanı Allahverdi Teymur oğlu Bağırovun doğum günüdür.

Allahverdi Bağırov 1946-cı il aprelin 22-də Ağdam şəhərində anadan olub. 1965-ci ildə məktəbi bitirdikdən sonra idmanla məşğul olub.

1990-cı ilin Qara Yanvar hadisələrindən sonra Allahverdi Ağdamda könüllülərdən ibarət batalyon təşkil etdi. 

1992-ci il iyunun 12-də Aranzəmin, Naxçıvanik, Dəhraz, Mirkənd, Pircamal kəndlərinin alınmasında iştirak edib. 

İki saat davam edən əməliyyat zamanı göstərdiyi qəhrəmanlığa görə Allahverdi Bağırov general Məhəmməd Əsədov mükafatı ilə təltif edilib. Aranzəmin kəndi uğrunda gedən döyüşdə onun bölməsi 100 erməni əsgərini öldürüb, 10 düşmən əsgərini əsir götürüb.

1992-ci il fevralın 25-26-da erməni yaraqlılarının Xocalıya hücumu məlum olanda hər kəs orada qalan insanları xilas etmək üçün şəhərə çatmağa çalışıb. Allahverdi Bağırov xeyli sayda Xocalı sakinini xilas edə bilib. O, üç gün ərzində 1003 Xocalı sakinini erməni əsirliyindən azad etməyə nail olub. O, vaxtaşırı məhbusların mübadiləsi ilə bağlı danışıqlar aparırdı. Allahverdi Bağırov böyük çətinliklə soydaşlarımızı əsirlikdən azad edə bildi.

O, batalyonu ilə Xankəndinə çata biləcəyinə inanırdı. Lakin postu yoxlamaqdan qayıdarkən Allahverdinin mindiyi avtomobil minaya düşüb. 

Ağdamın Quzanlı kəndinin girişində qəhrəmanın barelyefi quraşdırılıb.

Azərbaycan Respublikası Prezidentinin 24 fevral 1993-cü il tarixli fərmanı ilə Allahverdi Teymur oğlu Bağırova Azərbaycanın Milli Qəhrəmanı (ölümündən sonra) adı verilmişdir. Sonralar Heydər Əliyevin fərmanı ilə Allahverdi Bağırov “Qızıl Ulduz” medalı ilə təltif edilib.

A.Bağırov Ağdam şəhərindəki Şəhidlər Xiyabanında dəfn edilib. Ağdam ermənilər tərəfindən tutulduqdan sonra xiyaban dağıdılıb. İndi Ağdam uzun illər erməni işğalından azad edildikdən sonra bütün şəhər kimi Şəhidlər Xiyabanı da tam bərpa olunur.