Cavadxan Qasımov: 

27 Mart Azərbaycanda Elm Günüdür

27 mart Azərbaycanda Elm Günü olaraq qeyd olunur. Azərbaycan Respublikasında Elm gününün təsis olunması dövlətimizin elmi mühitə, elm adamlarına, elmi ictimaiyyətə olan qayğı və diqqətinin bariz ifadəsi olaraq çox əhəmiyyətlidir. Dövlət başçısı, cənab İlham Əliyev tərəfindən 2018-ci il 9 aprel tarixində imzalanan Sərəncamla 27 mart tarixini ölkəmizdə Elm Günü olaraq qeyd edirik.

“2022–2026-cı illərdə sosial-iqtisadi inkişaf Strategiyası”na əsasən, bütün sferalarda olduğu kimi, təhsil sahəsində də islahatların aparılması əsas hədəflərdən biri olaraq müəyyən olunub. Ümummilli liderimiz Heydər Əliyevin elmin uzunmüddətli inkişafına və elm adamlarına yaratmış olduğu səmərəli fəaliyyət mühitinin nəticəsi özünü hər addımda göstərməkdədir. Bu məqsədlə də, ölkəmizdə elm və təhsil sahələrində islahatların davam etdirilməsi, peşə təhsilinin əhatə dairəsinin genişləndirilməsi, ali təhsilin əlçatanlığının və əhatəliliyinin artırılması və bir çox digər istiqamətlər üzrə tədbirlərin həyata keçirilməsi nəzərdə tutulur.

Qalib ölkənin inkişaf edən ali məktəbi olaraq, Naxçıvan Dövlət Universitetinin elm və təhsilin inkişafı sahəsindəki perspektivləri ölkəmizin elm və təhsil siyasətinin uğurlu davamlılığı sahəsində mühüm bir töhfə olmaqdadır. Geridə qalan 2024-cü ilin yekunlarına görə dinamik artım tempinə malik olmuşdur. Əməkdaşlar, nüfuzlu elmi nəşrlərdə əsərlərini çap etdirməklə, beynəlxalq miqyasda öz fəaliyyətlərini qurmuşlar. Universitetin malik olduğu resurslar, genişmiqyaslı tədqiqatlar üçün mühüm baza oldu ki, bu da, özünü geridə qalan ilin uğurlu elmi nəticələrini təşkil etmiş oldu. Elmi tədqiqatlar sahəsində əhəmiyyətli irəliləyişlər oldu.

Diqqət etdikdə aydın olur ki, 2024-cü ildə Naxçıvan Dövlət Universitetində 2400-dən çox elmi əsər nəşr olunub. Belə ki, Scopus və Web of Science bazalarında nəşr sayı 63 olub ki, bu da ötən illərlə müqayisədə ciddi artım demək olur. Scopus və Web of Science məqalələrinin sayı son 5 ilin ümumi göstəricilərindən artıq olub. Belə ki, 2020-ci ildə universitet üzrə cəmi 579 nəşr olmuşdu ki, buna görə heyət üzrə orta nəşr sayı 1,3 olub. 2024-cü ildə hər bir akademik heyətə düşən nəşr sayı 4.3 olub. Təkcə 2023-cü illə müqayisədə hər əməkdaşa düşən nəşr sayı 1 vahid artıb. 2019-2023-cü illərdə 5 ilin nəticəsinə görə Scopus bazasında cəmi 34 nəşr var idisə, təkcə 2024-cü ildə bu say 53 olub.

Ali məktəbimizin rektoru, kollektivin sevimlisi hörmətli Elbrus müəllimin rəhbərliyi ilə elmi potensialının daha da yüksədlilməsi sahəsində həyata keçirilən tədbirlər nəticəsində əməkdaşların elmi fəaliyyətinin qiymətləndirilməsi və onların motivasiya olunması sahəsində tədbirlər uğurla davam etdirilməkdədir. Elm günü münasibətilə bütün həmkarlarımıza uğurlar arzu edirəm.