Pənah Rüstəm: 

Dəniz dolu duyğular

(düşüncələr)

Qış yeni qədəm qoyub torpağımıza. Amma hava təəccübləndirir. Birdən buludlar dağılır və günəş bizi salamlayır. Qışda nadir olan belə günləri xoşlayıram. Sanki yazın gəlişini “hazırlayan” məqamları deyirəm. Şaxtalı havada qaralmış göyün açılması, günəşin buludlar arasından “yol tapıb” çıxması və “göz vuraraq” parlaması təbiətin möcüzəsi deyilmi? Belə günlərin birində, illər öncə yaşadığımız mənzərənin şahidi olub - yazmamaq günah olar.

Dənizkənarı parkda olub hadisə. Qayağılar şahid oldu təbiətin “zarafatına”. Həmişə çətin anlarda sirrimi dənizlə bölüşür, təskinlik tapardım. Başımın üstünü qəfil alan xəstəlik planları alt - üst etdi. Amma sonda qalib özüm oldum. Böhrandan rəbbimin himayəsi, gücü və iradəm hesabına çıxdım.

Ona görə dənizin möcüzəli “terapiyası” əzizdir. Qısa müddətdə toparlana, əvvəlki rejimə qayıtdım, sifarişləri vaxtında çatdırdım. Sanki yeni ruh - qüvvə gəldi, ən çətin yazılara “girişdim”, heç nədən çəkinmədim - geri durmadım. Əksinə, əvvəlkindən çox material yazdım, maraqlı layihələrə qol qoydum. Hətta bir çox mahnılara mətn yazdım. Poetik tərcümələrə başladım, müasir şairlərin şerlərini ruscaya çevirdim. Bədxahların “proqnozlarlnı” pozdum. Bəli, xəstəliyə boyun əymədim. Və bu gün qalib kimi yoluma davam edirəm.

Bu gücü doğma dalğaların səsindən alıram. Və sevgimi Xəzərə yazdığım sətirlərlə dilə gətirirəm.

Dalğalar

Xəyal fikir dünyamı

beşik kimi yırğalar,

yorğun - vurğun,

qəlbə uyğun dalğalar.

Ləpələr dənizin

səssiz nəfəsi,

sözün deyəsi,

xoş kəlmə eşidən

yalqız dalğalar.

II

Istər payız, istər qış,

göyün üzü açılmış,

sahil, ləpədöyəndə

görüşüb, sevinirsiz,

nə deyirsiz dalğalar?

Ürəklərə dəvasız,

könüllərə şəfasız,

dostluğa dayaqsız,

ay vəfalı dalğalar.

Son söz əvəzi

Bu sətirləri mahnı üçün yazdım. Amma bəstəyicisi olmadı. Neynək, bəlkə qəlbi payızla dolu nəğməkar haçansa bu mətnə musiqi yazar. Bir sözyazarı kimi çox sevinərəm...

Foto haqda ayrı deyəcəyim var. Dəniz vağzalı sevimli məkanımdır. Cəmi bir dəfə gəmiylə səyahətə çıxmışam. O da qonşu Türkmənistana, keçmiş “Krasnovodsk” - indiki “Türkmənbaşı” şəhərinə yola düşdüm. Çox maraqlı keçdi səfərimiz. Mənəvi - estetik zövq aldım. Dalğalar əla yoldaşlıq edir, darıxmağa qoymur. Yadıma məşhur mahnı düşdü - “Liman və mən”. Xəstəliyə qörə həkimlər təyyarəyə minməyi qadağan etdi. Yalnız qatar və gəmiyə icazə var...