Bəybala Mirzəyev: 

Hiperaktiv "telefon diplomatiyası"...

Putin Bakı ilə Astana, Əliyevlə Tokayev arasında az qala telefondan asılı vəziyətdə qalıb.

Daha doğrusu, "24 Kanal" Yutub-kanalının aparıcısı Oleq Belousovun sözüylə desək, Azərbaycana məxsus təyyarənin Rusiya HHM tərəfindən vurulmasının izlərinin yox edilməsi üçün əvvəlcə Tokayevə minnətçi düşən Vladimir Putin, məsələnin həllinin açarının Astanada yox, Bakıda olduğunu dərk edəndən sonra, indi də tez-tez İlham Əliyevə zəng etməyə başlayıb.

Son iki gündə Putin Əliyevə iki dəfə zəng vurub. Ümumilikdə isə son 5 gündə üç dəfə danışıblar.

Putin təyyarəmizin vurulması məsələsinin məhkəmə mərhələsinə çatmadan, dövlət başçılarının öz arasında şifahi razılaşma ilə yoluna qoyulmasına, bağlanmasına çalışır.

Əliyev isə prinsipial mövqe tutub.

Və Əliyevin bu cür prinsipiallığı həm bir çoxlarını heyrətləndirir, həm də eyni zamanda təqdirlə qarşılanır.

Ona görə heyrətlə qarşılayırlar ki, çünki düşünürdülər ki, Azərbaycanın Rusiya ilə müttəfiqliyinə və İlham Əliyevin üzünü Qərbdən Rusiyaya çevirməsinə görə rəsmi Bakı Moskvadan hesab sormayacaq, cəsarətsiz davranacaq və s.

Lakin onların bu təxminləri özünü doğrultmadı. Göründüyü kimi Azərbaycanın bir addım belə geri çəkilmək fikri yoxdur.

Başqa sözlə desək, Azərbaycan Rusiyanı müttəfiqlik və qonşuluq prinsiplərinə hörtmətlə yanaşmağa məcbur edir. Və Azərbaycanın bu cür qətiyyətli mövqeyi həm Türk dünyasında və postsovet məkanında, həm də beynəlxalq ictimaiyyət tərəfindən rəğbətlə qarşılanır.

İmperiya ambisiyalı davakar bir dövlət qarşısında dönməz xarakter nümayiş etdirməyimiz və haqqımızı tələb etməyimiz digərlərini də cəsarətləndirir. Xüsusən də Türküstandan (Mərkəzi Asiyanın türk dövlətlərindən) və Ukraynadan olan ictimai fəalların, ekspertlərin, blogerlərin Azərbaycanın Rusiyanın qarşısında qorxmadan, çəkinmədən dirəniş göstərməsini böyük coşqu ilə təqdir etmələrini qeyd etmək istərdim.

Bu arada Zelenskinin də srağa gün "X" platformasındakı hesabından Azərbaycana başsağlığı verməsinə baxmayaraq, ötən gün Putinin İlham Əliyevə üzrxahlıq zəngindən sonra, onun da İlham Əlievə zəng vurmasını "qonşudan dala qalmamaq" və fürsətçilik kimi dəyərləndirən bəzi rusiyapərəstlərimizin nəzərinə çatdırım ki, Zelenskinin Əlievə zəng vurması qətiyyən fürsətçilik məqsədi daşımırdı.

Azərbaycanlı həmkarına zəng vuran Ukrayna liderinin məqsədi Putinin Ukrayna-Azərbaycan münasibətlərini korlamaq cəhdinin qarşısını almaq idi. Çünki Putin AZAL-ın təyyarəsinin vurulmasının günahını Rusiya HHM-nin üzərindən sovuşdurub Ukraynanın boynuna yıxmağa və həlak olan Azərbaycan pilotlarının üzərinə qoymağa çalışır. Lakin bunun belə olmadığını İlham Əliyev də, Zelenski də yaxşı bilir.

P.S.

Putinin hiperaktiv "telefon diplomatiyası" Rusiya tərəfinin məsələni ört-basdır etmək istəyinə xidmət etsə də, lakin bu, baş verməyəcək. İlham Əliyev demişkən, biz öz tələblərimizi açıq şəkildə Rusiya tərəfinə bildirmişik və ümid edirik ki, bizim şərtlərimiz qəbul ediləcək.

(ardı var)