"Qarabağ" İsveçdə "Elfsborq"un qonağıdır

Bu gün futbol üzrə UEFA Avropa liqasının əsas mərhələsində sayca 6-ci tura start veriləcək. Sözügedən turnirdə Azərbaycanı təmsil edən ölkə çempionu "Qarabağ" klubu isveçdə yerli "Elfsborq" klubunun qonağı olacaq. Taleyi portuqaliyalı referi Antonio Nobreyə tapşırılan həmin oyun gecə saat 00:00-da İsveçin Buros şəhərindəki "Buros-Arena"da başlayacaq.

Yeri gəlmişkən "Qarabağ" geridə qalan 5 oyundan sonra cəmi 3 xalla 36 komandanın yer aldığı yarış cədvəlində 32-dir. Xatırladaq ki, beş oyunda "Tottenhem"ə (0:3), "Malmö"yə (1:2), "Ayaks"a (0:3) və "Lion"a (1:4) uduzan "Qarabağ" yalnız "Bude-Qlimt"i (2:1) səfərdə üstələyə bilib.

Rəqibə gəlincə, "Elfsborq" 4 xalla 28-ci pillədə yer alıb. Beş oyunda 1 qələbə qazanıb, 1 heç-heçə edən rəqib 3 dəfə məğlub olub. Buraxdığı 11 qola 7 qolla cavab verib.

Beş turdan sonra turnir cədvəlinə 16 xalla "Atletik" liderlik edir. Hərəyə 13 xalı olan "Latsio" və "Ayntraxt F" isə 2-3-cu yerleri bölüşür. Aktivində 11 xalı olan "Qalatasaray" isə dördüncü yerdədir.

Bombardilərin siyahısına 5 qolla Barnabaş Varqa başçılıq edir. Qalatasarayli Yunis Akgün də daxil olmaqla daha 4 nəfər isə 4 qolla 2-5-ci yerləri bölüşür.

İNTİQAM Məmmədov