Bəybala Mirzəyev: 

Səfirin "kamikadze"liyi...

Fransanın Ermənistandakı səfiri Olivye Dekotini növbəti dəfə Ermənistan-Azərbaycan sərhədinə gəlməklə ölkəmizə qarşı yeni bir təxribata yol verib.

Avropa İttifaqının (Aİ) Ermənistandakı dırnaqarası "Mülki" Missiyası isə bu təxribata yol verilməsi üçün ona şərait yaradıb və bununla da Dekotininin suçuna şərik olub.

"Biz Fransanın Ermənistandakı səfirini qərargahımızda qəbul etməkdən şərəf duyuruq", - Aİ-nin "Mülki" Missiyasının yaydığı məlumatda belə deyilir.

Sözügedən "Mülki" Missiya biraz da irəli gedərək fransalı səfiri bizim ərazilərimizi müşahidə edən patrul dəstəsinə qoşub.

“O, həmçinin yerlərdə fəaliyyətimizə nəzarət etmək üçün Xaçık kəndinin patrul dəstəsinə qoşulub”, - Missiyanın açıqlamasında bildirilir.

Bəs, səfirin bu təxribata əl atmaqda məqsədi nədir?

Fransanın özündə dərin siyasi böhranın yaşandığı, hökumətin buraxıldığı və Makronun özünün də istefasının gündəmə gəldiyi belə bir kritik məqamda bu ölkənin İrəvandakı səfiri nədən Azərbaycana qarşı təxribata yol verir? Bəlkə, bu, hal-hazırda Fransada hökumətsizliyin hökm sürməsindən qaynaqlanır?

Görünən budur ki, Dekotini Fransada öz "boss"larının - xarici işlər nazirlərinin tez-tez dəyişməsindən istifadə edərək, diplomatik protokoldan kənara çıxmağı, "kamikadze"lik etməyi və Azərbaycan hərbçilərini təxribata çəkərək sərhəddə insident yaratmağı qərara alıb.

Başqa sözlə desək, fransız səfir ermənilərin "xeyir-dua"sı və Aİ-nin "Mülki" Missiyasının əli ilə Fransada "qəhrəman" diplomat, cəsur səfir kimi tanınmağa çalışır.

Bəsit və axmaq qərardır.

Bu cür "qəhrəman"lıqlar adətən rüsvayçı sonluqla bitir.

Və Dekotini belə təxribatları ilə əslində öz ölkəsinə problem yaradır.

Makronun səfirləri odla oynayırlar...