Bahəddin Həzi: 

Şadam ki, Müsəllim Həsənov kimi düşüncə jurnalistikasının fədakarları hələ də qalıb...

Müsəllim Həsənov, bizim yaradıcı nəslin Müsəllimidir. Talantlı, təmkinli, səmimi, dərin... Çox söz demək olar. Ancaq sözün çoxunu Müsəllim Həsənov özü deyib. Özü də çoxdan deyib. Və hələ də hamısını deyib bitirməyib; davam edir.

Müsəllim Həsənov ustad publisistdir, usta araşdırmaçıdır. Başlıcası, gözəl insandır. Mən çox şadam ki, Müsəllim Həsənov kimi ciddi imzalar, düşüncə jurnalistikasının fədakarları hələ də (az da olsa), qalıb, yaşayır, yaradır.

Sözün bitməsin, əziz qardaş! Qələm adamının sözü bitəndə ömrü də bitir. Durğu işarələri arasında vergül işarəsinə sənin hələ çox ehtiyacın olacaq. Bizim də sənə çox ehtiyacımız var. Sənin kimi ayıq yaradıcı intellektə ehtiyacımız çoxdur

Hələ yaşanacaq çox illərin, görüləcək çox işlərin, deyiləcək çox sözün, yazılacaq çox yazın var. Ona görə də çox axtar, çox düşün, çox düşündür, çox sev, çox sevil, çox sevin, çox gül, çox işlə. Bir sözlə, çox yaşa, çox yarat.

Pensiya yaşına çatmısan, ancaq qocalıqdan pensiyaya çıxsan da, yaradıcılıqdan pensiyaya çıxma.)) Səni dinləmək, izləmək, oxumaq həmişə maraqlı və faydalıdır.

Bir çox imzalar var ki, yaşayan nostalji qaynağı, təsəlli yerimizdir. Allah dünyasını dəyişənlərə rəhmət eləsin! Məmməd Nazimoğlu, məsələn. Nə qədər zaman keçsə də, bu adın duyğusu soluxmayacaq. Zöhrab Əmirxanlı da o cümlədən. Müsəllim Həsənov isə publisistikanın yaşayan klassiklərindəndir. Qulu Meherremli kimi, Arif Aliyev , İbrahim Nebioğlu, Elçin Şıxlinski kimi, Hikmət Sabiroğlu kimi, Afaq kimi, Fəxri kimi, Azər Qaraçənli kimi, Rauf Mirqədirov kimi, Hüseynbala Səlimov kimi... Hamısını sadalasam, yer çatmaz. Çünki bu gün səndən - Müsəllim Həsənovdan danışmağın daha çox yeri var; yubilyarsan axı.

Yubilyar demişkən, qardaş, sənin tamaşaçılarına, izləyicilərinə, oxucularına bir sual verəcəm:

"Bilirdinizmi?!"

Müsəllim Həsənovun 65 yaşa çatdığını bilirdinizmi?! Ömrünün yaş statistikası ilə özünün fiziki və ruhsal dinamikası arasında kontrastı görə bilirsinizmi?! Ən azı 100 yaşı hədəflədiyini də bilirsinizmi?