Respublika toxumçularının II forumu və sərgi-satış yarmarkası – MASALLIDA

Masallı rayonunda Kənd Təsərrüfatı Nazirliyi Aqrar İnnovasiya Mərkəzinin təşkilatçılığı, Masallı Rayon İcra Hakimiyyətinin dəstəyilə toxum sərgi-satış yarmarkası və rtespublika toxumçularının II formu keçirilib. 

Yarmarkada fermerləri maraqlandıran müxtəlif kənd təsərrüfatı təyinatlı texnologiyalar və məhsullar da nümayiş olunub.

Masallı Rayon İcra Hakimiyyətinin başçısı Araz Əhmədov Prezident İlham Əliyevin aqrar sahənin inkişaf etdirilməsi barədə imzaladığı müvafiq sərəncamların icrası ilə əlaqədar qarşıda duran vəzifələrlə bağlı kartofçuluğun inkişaf etdirilməsi, taxıl biçininin vaxtında başa çatdırılması və tərəvəz əkinlərinin artırılması, sitrus meyvəçiliyi, çay və çəltik istehsalının artırılması məqsədilə rayonun bütün inzibati ərazi dairələrini əhatə edən 3 zona müşavirəsi keçirildiyini bildirib. Keçirilən müşavirələrdə fermerlər və torpaq mülkiyyətçilərinin sertifikatlı toxumların, müasir kənd təsərrüfatı texnikalarının, soyuducu anbarların, tədarük məntəqələrinin olmamasını, həmçinin subsidiyaların vaxtında verilməməsini, subsidiya əmsallarının artırılmasını, xüsusilə subsidiya verilməyən təkrar əkinlərə subsidiya verilməməsini qeyd edən A.Əhmədov qaldırılan məsələlərin həll olunması istiqamətində rayon icra hakimiyyəti tərəfindən aidiyyəti üzrə müraciətlər ünvanlandığını diqqətə çatdırıb. 

Aqrar İnnovasiya Mərkəzinin direktoru Anar Cəfərov fermerlərin aqrar innovasiyalara və maliyyə mənbələrinə çıxışını əlçatan edən bu festivallarda əməkdaşlıq imkanlarının geniş olduğunu vurğulayıb. O, deyib ki, yarmarkanın keçirilməsində məqsəd yerli toxum bazarının formalaşması, payızlıq əkinlər ərəfəsində yerli toxuma olan tələbatın ödənilməsi, toxum istehsalçıları ilə fermerlər arasında birbaşa münasibətlərin qurulmasına kömək etməkdir. 

Azərbaycanda qeyri-neft sektorunun aparıcı istiqamətlərindən olan aqrar sahənin uğurla inkişaf etdiyini deyən Aqrar Xidmətlər Agentliyinin sədr müavini Cəfər Məhərrəmov bildirib ki, bu gün ölkəmizdə kənd təsərrüfatının inkişafı istiqamətində olduqca münbit bir şərait yaradılıb, fermerlərə dövlət tərəfindən hərtərəfli qayğı və dəstək göstərilir. 

Azərbaycan Toxumçular Assosasiyasının sədri Mədinə Əliyeva qeyd edib ki, hazırda ölkə əhalisinin bir çox ərzaq məhsullarına olan tələbatı yerli istehsal hesabına məhz sertifikatlı və rayonlaşdırılmış toxumlar vasitəsilə təmin edilir. 

Respublika Sahibkarlar Təşkilatları Milli Konfederasyasının vitse-prezidenti Jalə Hacıyeva yerli toxum istehsalçıları, iri toxum istehsalı və satışı ilə məşğul olan təchizatçılar və fermerlərə yaradılan bu şəraitlə bağlı aidiyyəti qurumlara təşəkkürünü bildirib, fermerləri əməkdaşlığın daha da artırılmasına dəvət edib. 

Azərbaycan Toxumçular Assosasiyasının sədri Mədinə Əliyevanın moderatorluğu ilə aparılan forumda yerli toxum istehsalçıları, iri toxum istehsalı - satışı ilə məşğul olan təchizatçılar və fermerlər iştirak edib. 

Akif AĞAYEV