Ronaldo 900 qola çatan ilk futbolçu oldu

Portuqaliya millisinin hücumçusu Kriştiano Ronaldo Millətlər Liqasının qrup mərhələsində Xorvatiya ilə matçda qol vuraraq karyerasında 900 qol həddini keçən ilk futbolçu olub. Ən yaxın təqibçisi Lionel Messi 62 qol geridədir.

Sentyabrın 5-də UEFA Millətlər Liqasının qrup mərhələsinin ilk oyununda Portuqaliya Xorvatiyaya qalib gəlib. Lissabonda 1-ci A divizionunun görüşü keçirilib və 2:1 hesabı ilə yekunlaşıb. Ronaldo 34-cü dəqiqədə komandasının ikinci qolunu vurub.

Beynəlxalq Futbol Tarixi və Statistikaları Federasiyasının (IFFHS) məlumatına görə, Ronaldo futbol tarixində yüksək səviyyəli matçlarda 900 qol vuran ilk oyunçu olub. Ən yaxın təqibçisi "İnter Mayami"nin argentinalı hücumçusu Lionel Messi 62 qol geridədir. İlk üçlüyü braziliyalı Pele (762 qol) tamamlayır.

“Bu, mənim üçün çox şey deməkdir. Bu, çoxdan əldə etmək istədiyim bir mərhələ idi. Bu rəqəmə çatacağımı bilirdim, çünki oynamağa davam etdikcə bu, təbii olaraq baş verəcək. Hər gün işləməyin, fiziki və mənəvi cəhətdən hazır olmağın, 900 qol vurmağın necə çətin olduğunu ancaq mən və ətrafımdakı insanlar bilir. Bu, karyeramda unikal bir mərhələdir”, - deyə Ronaldo matçdan sonra jurnalistlərə bildirib.

Ronaldonun millidə 209 matçda vurduğu 131 qol da rekorddur. Messi bu siyahıda ikincidir - onun və İranın sabiq hücumçusu Əli Dayinin hərəyə 109 qolu var. Ronaldo klublar üçün 769 qol vurub, hücumçu isə Real Madriddə 450 qol vurub.

Portuqaliya millisi Millətlər Liqasının A Liqasının 1-ci qrupunun turnir cədvəlində əlavə göstəricilərə görə Polşadan geri qalaraq ikinci yerdədir. Portuqaliyalılar növbəti matçını sentyabrın 8-də Şotlandiyaya qarşı keçirəcək.