Olimpiya çempionlarımız Heydərovla Kotsayev rəqibləri üçün əlçatmaz olub

Beynəlxalq Cüdo İttifaqı (İJF) Paris-2024-də cüdo yarışları başa çatandan sonra cüdoçuların Oyunlarda göstərdikləri nəticələri nəzərə almaqla kişi və qadınların yeni reytinq cədvəlini açıqlayıb. Nəticələr yeni cədvəldə öz əksini tapib. Maraqlıdır ki, Olimpiada-2024-də çempionluq zirvəsinə yüksələn cüdoçularımız - Hidayət Heydərov (73 kq) və Zəlim Kotsayev (100 kq) aktivlərindəki xallarını xeyli artırmaqla ən yaxın təqibciləri üçün əlçatmaz olub. Olimpiadaya reytinq lideri və çəkisinin əsas favoriti kimi gedən Heydərov Olimpiya çempionu adını qazanaraq aktivindəki xalların sayını 10004-ə çatdırıb. O, cədvəldə ən yaxın təqibçisi olan italiyalı Manuel Lombardonu 4812 xal geridə qoyub. Digər olimpiya çempionumuz - aktivindəki xalların sayını 8512-yə catdiran Zəlim Kotsayevsə (100 kq) ən yaxın təqibçisi olan və Paris-2024-ün həlledici finalında məğlub etdiyi gürcüstanlı İlya Sulamanidzeni 1562 xal qabaqlayır. 

Digər olimpiyacilatimiza gəlincə, Balabəy Aqayev (60 kq) yerində saymaqla 7-dir. 66 kq-da tatamiyə çıxan Yaşar Nəcəfov 10 pillə geriləməklə 21-ci, 81 kq çəkidə güləsən Zəlim Tskayev isə iki pillə geriləməklə 8-ci yerə düşüb. 90 kq-da çıxış edən Elcan Haciyev isə 3 pillə irəliləyərək 15-ci olub. Uşanqi Kokuari (+100 kq) isə 4 pillə irəliləyərək 13-cü yerə qalxıb. 

Qadın olimpiyaçılarımızdan Leyla Əliyeva (48 kq) 22-dən 20-yə qalxıb. Gültac Məmmədeliyeva (52 kq) isə 4 pillə geriləməklə 13-cü yerə düşüb.

İNTİQAM Məmmədov