Fransada Olimpiya Oyunlarının açılışı günü qatarların hərəkətinin pozulması təxribat adlandırılıb

Fransa hökuməti Olimpiya Oyunlarının açılış mərasimi günü sürətli qatarların hərəkətinin dayandırılmasına münasibət bildirib, insidenti təxribat adlandırıb. 

Hakimiyyət insanların tətilə getdiyi gün və Olimpiya Oyunlarının açılış mərasimi günü cinayət törətmiş təxribat əməllərini pisləyir.

Qatarların hərəkətinin pozulmasına səbəb dəmir yolunda rele şkaflarının yandırılması olub. Həmçinin, jurnalistlərin məlumatına görə, naməlum şəxslər relslərdəki kabelləri kəsərək yandırıblar.

İyulun 26-da axşam saatlarında Fransada Yay Olimpiya Oyunlarının açılış mərasiminin keçirilməsi planlaşdırılır. Bu gün səhər saatlarında Reuters xəbər agentliyi respublikanın bir sıra dəmiryol xətlərində nasazlıq yarandığını bildirib. Cənub-şərq və Atlantik istiqamətlərində nəqliyyatın hərəkəti xüsusilə ciddi şəkildə pozulub.

Müxbirlərə məlum olub ki, TGV sürətli qatar şəbəkəsi vandalların hücumuna məruz qalıb. Bu səbəbdən yüz minlərlə insan vağzallarda ilişib qalıb və indi ehtiyac duyduqları yerlərə gedə bilmir.

Bundan əvvəl Parisdə Beynəlxalq Olimpiya Komitəsinin (BOK) üzvlərinin qaldığı otelin işçiləri tətilə çıxıblar.