Lamin Yamal Avro-2024-də ən bahalaşan futbolçu olub

İyunun 14-dən iyulun 14-dək Almaniyada futbol üzrə keçirilən UEFA Avropa çempionatı (Avro-2024) bu yarışda qalibi adını qazanan İspaniya millisinin və "Barselona" klubunun 17 yaşlı yarımmüdafiəçisi Lamin Yamal üçün daha uğurlu, həm də əlamətdar olub. Belə ki, 17 yaşını da məhz bu çempionat ərəfəsində tamamlayan və qeyd edən Yamal Avro-2024-də bir neçə əlamətdar hadisə ilə tarixə düşüb.

İlk növbədə o, yaşından asılı olmayaraq, Avro-2024-un nəticəsinə görə ən çox bahalaşan futbolçu kimi tarixə düşüb. Belə ki, cempionatla baqli olaraq onun qiyməti daha 30 milyon avro artaraq 120 milyona çatıb. Avro-2024-də mümkün 7 oyunun hamısında meydanda olan Lamin vurduğu bir qol və 4 məhsuldar ötürmə ilə də diqqəti cəkib. O, eyni zamanda 1/2 finalda Fransa millisinin qapısına qol vurmaqla AÇ və DÇ tarixlərində qol vuran ən gənc futbolçu kimi tarixə düşüb. Bu göstərici ilə, Lamin Yamal əfsanəvi Peleni də geridə qoyaraq rekord vurub. Belə ki, Pele DÇ1958-də qol vuranda 17 yaş 244 günlük olduğu halda, Yamin Avro-2024-də qol sevincini 16 yaş 362 günündə yaşayıb.

Lamin Yamal, həm də Avro-2024-un ən yaxşı gənc futbolçusu kimi də tarixə düşüb. "Barsa"-nın U-13 komandasından gələn Lamini artıq Lionel Messi ilə müqayisə edir və ona bənzədirlər.

İNTİQAM Məmmədov