İspaniya millisi dördqat Avropa çempionudur

İyunun 14-də Almaniyada Köhnə Qitənin 24 komandasının iştirakı ilə startı verilən futbol üzrə UEFA Avropa çempionatına (Avro-2024) nəhayət ki, dünən Berlindəki "Olimpiastadion"da İspaniya ilə İngiltərə arasında baş tutan həlledici final oyunu ilə yekun vurulub. Taleyi fransalı referi Fransua Leteksə və onun laysman həmyerlilərinə tapşırılan oyun Luis de la Fuentenin başçılıq etdiyi İspaniya millisinin qələbəsi ilə başa çatıb - 2:1. Bununla da "Qırmızı furye" tarixində dördüncü dəfə Avropa çempionu (AÇ-1964, AÇ-2008, AÇ-2012 və AC-2024) adını qazanmaqla Köhnə Qitənin rekordçusu olub. Buna qədər isə İspaniya və Almaniya hərəyə 3, Fransa və İtaliya isə hərəyə 2 dəfə Avropa çempionu olmuşdu. 

Oyuna və vurulan qollara gəlincə, ilk yarısı qolsuz bərabərliklə bitən matçın 47-ci dəqiqəsində ispaniyalı Niko Uilyams hesabı açmaqla komandasını irəli çıxarıb - 1:0.

Olduqca maraqlı, gərgin və dramatik bir məcrada davam edən oyunun 78-ci dəqiqəsində İngiltərəli Koul Palmer dəqiq zərbə ilə pozulmuş statusu bərpa edib - 1-1. 

Matçın 86-ci dəqiqəsində isə İspaniya millisi Kukurinin ötürməsinı qola çevirən Oyarsabalin sayəsində yenidən hesabda irəli çıxıb - 2:1. Bundan sonra hər iki komandanın qol vurmaq şansı olsa da hesab dəyişməz qalıb. Bu isə ispanlara dördüncü dəfə Avropa çempionu adını qazandırıb. 

Onu da qeyd edək ki, çempionun heyətində forma geyinən Rodri Avro-2024-un ən yaxşı futbolçusu seçilib. Final matçından bir gün əvvəl 17 yaşı tamam olan Lamin Yamal isə çempionatın ən yaxşı gənc oyunçusu adına layiq görülüb. 

Burada bəxti gətirməyən isə iki dəfə dalbadal Avropa çempionatının (AÇ -2012, AC-2024) finalda büdrəyən İngiltərə millisi və bu komandanın 30 yaşlı forvardi Harri Keyn olub. Keyn ümumiyyətlə, karyerasında altıncı dəfə finalda uduzub (müxtəlif turnirlərdə). 

İspaniya millisi Avro-2024-də statdan finaladək keçirdiyi 7 oyunun hamısını qələbə ilə bitirib. Xatırladaq ki, yer aldığı B qrupunda Xorvatiya (3:0), İtaliya (1:0) və Albaniyanı (1:0) məqlub edən İspaniya millisi 1/8-də Gürcüstanı (4:1), 1/4-də Almaniyanı (2:1), 1/2-də Fransanı (2:1), finalda isə İngiltərəni (2:1) məqlub edib. Yeri gəlmişkən, İspaniya ilə İngiltərə arasında bu final da daxil olmaqla 28 oyun keçirilib. 14 dəfə ispanlar, 10 dəfə britaniyalilar qalib gəlib. Qalan 4 oyun heç-heçə bitib. Top fərqi isə 46:34 İngiltərənin xeyrinə olub. İlk qarşılaşma 1929-cu ildə yoxlama oyunu olub və ingilislər qalib gəliblər - 4:3. Son dəfə isə komandalar 2018--ci ildə Millətlər Liqasında üzləşmişdi və həmin oyun isə ispanların qələbəsi ilə bitmişdi - 3:2.

Bu dəfə də qələbəyə sevinən ispanlar olub.

İNTİQAM Məmmədov