"Baku Open2024"-ün qalibi iranlı Sina Movahed olub

İyunun 29-da Bakı İdman Sarayında 12 ölkəni təmsil edən 300-dən artıq şahmatçının iştirakı ilə startı verilən və FİDE-nin  illik yubileyinə həsr olunan ənənəvi "Baku Open-2024" beynəlxalq şahmat turnirinə dünən baş tutan 9-cu turla yekun vurulub. Mükafat fondu 50 min dollar təşkil edən turnirin A qrupunun (əsas qrup) qalibi 9 mümkün xaldan 7 xal toplayan İran şahmatçısı Sina Movahed olub. Maraqlıdır ki, daha üç Hindistan şahmatçısı da onunla eyni xal ehtiyatına malik olub. Lakin əlavə əmsallara görə Movahed birinci yeri tutub. 2-3-cu yerləri isə müvafiq ardıcıllıqla hindistanlı şahmatçılar - Abhimanyu Puranik və Mitral Abitya (hərəyə 7 xal) tutub. Daha bir hindistanlı şahmatçı - Sl Narayanan isə 7 xalla dördüncü olub. Azərbaycan şahmatçıları arasında ən yaxşı nəticəni hərəyə 6,5 xal toplayan Vüqar Əsədli və Riad Səmədli göstərib. Cutluyumuz müvafiq olaraq 5-6-ci yerləri tutub. 

Turnirin reqlamentinə uyğun olaraq, ilk 20 yeri tutan şahmatçılar müəyyən məbləğdə pul mükafatı alıb. 1-3-cu yerin sahibləri müvafiq ardıcıllıqla 12, 8 və 6 min dollar mükafat qazanıblar. Turnirdə 4-20-ci yerləri tutanlar isə reqlamentə uyğun olaraq 3000, 2500, 2000, 1.600, 1.400, 1.200, 1000, 900, 800, 700, 600, 500, 400, 350, 300, 250 və 200 dollar mükafatla təltif olunublar.

Yeri gəlmişkən, "Baku Open2024"un iştirakçıları A və B qrupunda mübarizə aparıb. A qrupunda reytinq xalı 2100-dən yuxarı olan şahmatçılar, B qrupunda isə 8-12 yaşlı uşaqlar çıxış ediblər. 

8 yaşlılar arasında qızlardan Mədinə Eyvazova, oqlanlardan isə Nurlan Qənizadə qalib olub. 

10 yaşlılarda Məryəm Məmmədova və Eldar Aqacanov, 12 yaşlılar arasında isə Zəhra Allahverdiyeva ilə Əhməd Hüseyn fərqlənib.

Reqlamentə uyğun olaraq qaliblər ölkəmizi Avropa çempionatında təmsil etmək hüququ qazanıblar. Onlara dünən mükafatlandırma mərasimində Avropa çempionatına getmə pulu da verilib.

Qeyd edək ki, "Baku Open-2024"lə eyni vaxtda və eyni məkanda veteran şahmatçılar arasında Azərbaycan çempionatı keçirilib (55 yaşdan 65 yaşa qədər və 65 yaşdan yuxarı). 55 yaşdan yuxarı veteran şahmatçılar arasında İlqar Bacarani (8 xal), 65-dən yuxarıda isə Fikrət Sideyfzadə (7,5xal) qalib olub. Qaliblərə 3000 dollar mükafat verilib. Onlar eyni zamanda ölkəmizi veteranlarin İtaliyada keçiriləcək dünya çempionatında təmsil edəcəklər.

Dünən turnirin baqlaniş mərasimində Gənclər İdman Naziri Fərid Qayıbov və Azərbaycan Şahmat Federasiyasının prezidenti Mahir Məmmədov iştirak edib. 

Mahir Məmmədov çıxış edərək, FİDE-nin 100 illik yubileyinə həsr olunan bu turnirdə iştirak edən bütün iştirakçılara təşəkkür edib və gələcəkdə onları bir daha Bakıda keçiriləcək eyni adlı turnirdə iştirak etməyə dəvət edib.Turnirin birgə təşkilatçılığına görə Gənclər İdman Nazirliyinə və Təhsil Nazirliyinə təşəkkür edən Mahir Məmmədov şahmatçılara isə bu il Macarıstanda keçiriləcək Şahmat Olimpiadasında uqurlar arzulayıb.

İNTİQAM Məmmədov