Türkiyə millisi Avro -2024-ün pley-off mərhələsində

Almaniyada futbol üzrə keçirilən Avropa çempionatında dünən axşam saatlarında E və F qrupunda keçirilən oyunlarla yarışların ilkin qrup mərhələsinə yekun vurulub və pley-offda (1/8 final) mübarizə aparacaq komandaların hamısı müəyyənləşib. 

Dünən keçirilən qrup mərhələsinin oyunları arasında Azərbaycan futbol həvəskarları üçün daha çox maraq doğuran matç F qrupunda Türkiyə millisi ilə Çexiya yığması arasında olub. Türkiyə millisi üçün finala bərabər olan bu qarşılaşma ay-ulduzlularin minimal hesablı qələbəsi ilə başa çatıb - 2:1. 

Qarşılaşmada ilk qolu 51-ci dəqiqədə Türkiyə millisindən Xakan Calxanoqlu vurub - 1:0. Türk futbolçularınin qol sevinci uzun sürməyib. Qarşılaşmanın 20-dəqiqəsində Antonin Barak qırmızı kartla qovulandan sonra bir nəfər azlıqda qalan Çexiya millisi 66-ci dəqiqədə Tomaş Koycekin dəqiq zərbəsi ilə hesab bərabərləşib - 1:1. Bundan sonra oyunda gərginlik daha da artıb. Əslində Türkiyə millisinə pley-offa çıxmaq üçün heç-heçə də bəs edirdi. Lakin bir sıra əvəzləməlerdən sonra Türkiyə millisi rəqib qapısı ağzında ard - arda qol vəziyyətləri yaradıb. Nəhayət ki, matçın əlavə edilmiş vaxtında (90+4) Xakan Calxanoqlu Türkiyə millisinə hava və su kimi lazım olan və qələbə qazandıran qola imza atıb - 2:1. Bu qələbə Türkiyə millisinə qrup ikincisi olmaq imkanı verib. 

Qrupda keçirilən digər oyunda isə Portuqaliya millisi çempionatın debütanti olan Gürcüstan yığmasıyla qarşılaşıb. Matçın favoriti Portuqaliya hesab edilsə də qələbəni Gürcüstan yığması qazanıb - 2:0. Matçda vurulan qollara gəlincə, ikinci dəqiqədə Xvica Kvaratsxeliya  Mikautadzenin ötürməsinı qola çevirib - 1:0. Daha sonra 57-ci dəqiqədə isə Mikutadze özü fərqlənməklə hesabı artırıb - 2:0. Bu qələbə sayəsində Gürcüstan yığması  qrup üçüncüsü olan ən yaxşı komandalar arasında pley-offa adlayıb.

Qrup oyunları çərçivəsində E qrupunda da son oyunlar keçirilib. Slovakiya Rumıniya (1:1) ilə, Ukrayna isə Belçikayla (0:0) qarşılaşıb. Maraqlıdır ki, hər iki oyun heç-heçə bitib və bütün komandalar qrup mərhələni eyni xalla (4 xal) bitirib. Lakin əlavə göstəricilərə görə müvafiq ardıcıllıqla ilk üç yeri tutan Rumıniya, Belçika və Slovakiya 1/8 finala yüksəlib. Çempionatı tərk edən isə Ukrayna millisi olub.

Hər iki qrupda yekun turnir cədvəli belə olub:

E qrupunda:

Rumıniya  3  1  1  1  4:3  4

Belçika  3  1  1  1  2:1  4 

Slovakiya  3  1  1  1  3:3  4

Ukrayna  3  1  1  1  2:4  4.

F qrupunda:

Portuqaliya  3  2  0  1  5:3  6

Türkiyə  3  2  0  1  5:5  6

Gürcüstan  3  1  1  1  4:4  4

Çexiya  3  0  1  2  3:5  1.

Qeyd edək ki, 1/8 final oyunlarına iyunun 29-da start veriləcək. Həmin gün Berlində İtaliya - İsveçrə (19:00), Dortmundda isə Almaniya - Danimarka (22:00) oyunu olacaq.

İNTİQAM Məmmədov