Binə Mədəniyyət Mərkəzində kitab təqdimatı keçirilib 

AYB-nin üzvü şairə Esmira Günəşin "Cəsur Qəhrəmanlar" və "Şimşəkdən Dənizə" kitablarının təqdimatı bu dəfə Binə Mədəniyyət Mərkəzində keçirilib. Azərbaycan Respublikası Mədəniyyət Nazirliyinin təşəbbüsü ilə Binə Mədəniyyət Mərkəzində keçirilən tədbirdə ölkənin müxtəlif bölgələrindən şəhid ailələri iştirak edib. Həmçinin tədbirdə 24 saylı musiqi məktəbinin kollektivi, AYB-nin üzvü keçmiş zabit Rafael Tağızadə, Müslüm Maqomayev adına 11 illik musiqi məktəbinin fortepiano şöbəsinin müəllimi,  mahnı və instrumental janrda bir sıra vətənpərvər əsərlərin müəllifi bəstəkar Lalə Şirin, məktəblilər, tibb kollecinin tələbələri, musiqi məktəbinin şagirdləri, Xəzər rayon MKS-nin nümayəndələri, vətənpərvər gənclər və başqaları iştirak ediblər. Tədbirdə şairənin vətənpərvərlik mövzusunda yazdığı şeirləri səsləndirilib və musiqilər ifa olunub. Tədbirin sonunda şairə xanım şəhid Ülvü Məhərrəmovun anası Xatirə xanıma ad günü sürprizi edərək onu səhnəyə dəvət edib. Xəzər rayonu İcra başçısının göndərdiyi gül dəstəsi anaya təqdim olunub və şəhid Elçinin anası öz hədiyyəsi ilə şəhid anasını təbrik edib. Şəhid anası çox duyğulanıb və sevincini təşəkkürü ilə bildirib. Tədbir xatirə şəkilləri ilə yekunlaşdırıldıqdan sonra şəhid ailələri mədəniyyət işçilərinin təşkil etdiyi çay süfrəsinə qonaq olublar. Şairə Esmira Günəş yazdığı bütün kitablardan Xəzər rayon MKS-nə və Pirallahı kitabxanasına hədiyyə edib. Günün sonunda bölgələrdən gələn şəhid anaları Binə Şəhidlər Xiyabanını və şəhid Tural Abdullayevin ev muzeyini də ziyarət ediblər.