Elçin Səlimov:

DOĞUM GÜNÜN - MÖVLUDUN MÜBARƏK

Yaşasaydın bu gün 54 yaşın tamam olacaqdı. Amma torpaqlarımızın işğalı , sonra isə başlayan birinci Qarabağ savaşı , çoxları kimi sənin də bu arzunu ürəyində qoydu. Cəncliyinə baxmayaraq sən də əlinə silah aldın və torpaqlarımızı azad etmək üçün mübarizəyə qatıldın. Heç nəyə və heç kimə baxmayaraq , qulaq asmayaraq getdin , öncə Vətəndir şüarını özünə bayraq etdin. Qızğın döyüşlərə qatılıb şərəfsiz düşmənlərimizlə mərdliklə , gözünü qırpmadan vuruşmağa başladın. Əzizim Rahim , sən bunu etməyə də bilərdin . "Papa" nın , "Mama" nın gül balaları kimi qaçıb gizlənə bilər və müharibəyə qatılmazdın. Amma etmədin.

Çünki Vətən sevgisi və torpaq məhəbbəti səndə hər şeydən üstün idi. Çünki sən çox gözəl anlayırdın ki , Vətəni və torpağı olmadan yaşamaq mümkün deyil. Bunlarsız insan , əks təqdirdə heç yerdə və heç bir vaxt rahat yaşaya , xoşbəxt ola bilməz.

Mən heç o zaman sənin gənclik dövrünü doyunca görə bilməmişdim. Və müharibəyə gedib , döyüşlərə qatıldığını da çox sonra eşitdim. Çünki mən onda kənddən və buralardan uzaqda idim. Bu xəbərləri eşidəndən sonra geriyə döndüm və bütün bunların şahidi oldum. Elə həmin il idi...

Sənin və bir çoxlarının qanlı döyüşlərdə vuruşaraq şəhid olduğunuz il idi. Çox yaxşı xatırlayıram. 1994 -cü ilin qışı idi. Özü də qış həmin il çox sərt keçirdi. Biz böyük bir nümayəndə heyəti ilə , cəbhə bölgəsinə gəlmişdik. Əsgərlərimizlə görüşə gəlmişdik.

Görüşdük də ... Ağdamın Çəmənli kəndində ordumuzun igid əsgərləri ilə. Döyüşən bölmələrimiz həmin kənddə qalırdılar. Ordumuz kəndi yenicə azad etmişdilər. Hələ bəzi yerlərdə yanğınlar tam sönməmişdi və yanırdı. Mən o zaman səni və başqalarını görmək istədim. Elə bilirdim ki , siz də buradasınız. Lakin hərbi rəhbərlik bizə dedi ki , onlar Tərtər bölgəsində vuruşurlar və əlavə etdi ki ,orada çox ağır döyüşlər gedir , sizi oraya buraxa bilmərik. Biz bir-neçə saat əsgərlərimizlə Çəməmlidə vaxt keçirib , onlara ruh vermək məqsədi ilə çalıb-oynadıq və oradan da Fizuli rayonunun Bala Bəhmənli kəndinə getdik. Onda o kəndi də ordumuz düşməndən yeni azad etmişdi. Biz gecəni də orada qaldıq. Nə isə ...

Əziz Rahim , mənim indi bütün bunları xatırlayıb və yazmaqda bir məqsədim var. Sənin ruhuna sayğı duyduğumu və o zaman səninlə görüşmək şansımın olmadığını otuz ildən sonra sənin ruhuna çatdırmaq istədim. Və mən artıq o vaxtdan dəfələrlə sənin və digər şəhidlərimizin məzarlarını ziyarət etmişəm. Edəcəyəm də ...

Neçə ki , canım sağdır və ayaq üstəyəm.

Bu gün May ayının 19 -dur . Sənin dünyaya gəldiyin gündür. Və bu dəfə də onu sənsiz keçirəcək və ruhunla baş-başa qalacağıq. Mən də bu yazım ilə bir daha sənin ruhunu sevindirmək istəyir və sənə sayğılarımla , bir daha ruhun şad olsun söyləmək istəyirəm.

Və... Son olaraq ...

Əziz şəhidim , əziz əmi oğlum , cənnətdəki bu mövludun da mübarək olsun deyirəm. Rahat uyu igidim. Çünki torpaqlarımızın hamısı bu gün azaddır.

Ruhuna hörmət və böyük ehtiramla :

Elçin Səlimli.

19.05.2024.