Azərbaycanda ilk Peşəkar Çövkən Liqasına start verilib

Startda "Sərhədçi" klubu "Ağstafa Dilbaz"ı darmadağın edib 

Bu gün Binə Atçılıq Mərkəzində ilk dəfə olaraq ölkəmizdə keçirilən Peşəkar Çövkən Liqasına start verilib. Yarış başlamazdan öncə liqanın təntənəli açılış mərasimi keçirilib. Azərbaycan Respublikasının Atçılıq Federasiyasının prezidenti Elçin Quliyev və Gənclər İdman Naziri Fərid Qayıbovun çıxışından və təbriklərindən sonra mərasimin öz rəngarəngliyi ilə diqqət çəkən bədii hissəsi olub. Sonda isə meydan iştirakçı komandaların ixtiyarına verilib və bununla da Azərbaycanda ilk dəfə keçirilən, 2 dövrədən və 18 turdan ibarət olan PÇL-nin birinci turu start götürüb.

Qeyd edək ki, 10 komandanın mübarizə aparacağı liqanın ilk oyununda "Omar" və "Embavud" klubu qarşılaşıb. 30 dəqiqəlik mübarizə "Omar" klubunun minimal hesablı qələbəsi ilə başa çatıb - 1:0. 

Günün və turun ikinci oyununda "Aqstafa Dilbaz" və "Sərhədçi" klubu qarşılaşıb. İlk oyundan fərqli olaraq, ikinci oyunda tribunalarda əyləşən azarkeşlər sözün əsil məsnasında "qol yağışın"a şahidlik ediblər. Görüş ""Sərhədçi"-nin darmadağın hesablı qələbəsi ilə bitib - 7:0. Bu oyunun əsas qəhrəmanı isə qalıb komandanın kapitanı, rəqib qapısına 4 rol vurmaqla poker edən Vahid Məmmədov olub. 

Sabah eyni məkanda birinci turun daha üç oyunu keçirəcək:

"Polad"-"Zəfər ";

"Elit"-"Köhlən";

"Şirvan"-"Qarabağ".

Çempionata bu ilin 3-4 dekabr günlərində keçiriləcək son turla (18-ci) yekun vurulacaq.

Qeyd edək ki, ARAF-in daxili qaydalarına görə, liqada yalnız DNT testdən keçin "Qarabağ" və "Dilbaz" yerli cins atlar iştirak edir. 

Yeri gəlmişkən, bu ilin 10-16 iyun günlərində ölkəmizdə 8 komandanın iştirakı ilə ilk dünya çempionatı da keçiriləcək. Artıq iştirakçı komandaların beşi məlumdur. Qalan üçü isə qısa müddətdə bəlli olacaq. 

İNTİQAM Məmmədov