"Real" Çempionlar liqasının finalında 

Bu "Kral klubu"nun ÇL-da 18-ci finalı olacaq 

Dünən axşam saatlarında futbol üzrə UEFA Çempionlar liqasının yarımfinal mərhələsində daha bir cavab oyunu keçirilib və bununla da turnirin finalçıları müəyyənləşib. Söhbət İspaniyanın paytaxtı Madriddəki "Santyaqo Bernabeu" stadionunda Avropanın iki qrand klubu arasında baş tutan oyundan gedir. Ev sahibi olan Madrid "Real"i doqma divarlar arasında Munhenin (Almaniya) "Bavariya" klubunu qəbul edib. Olduqca dramatik bir məcrada davam oyun "Kral klubu"nun minimal hesablı qələbəsi ilə bitib - 2:1. 

Matçda vurulan qollara gəlincə, 68-ci dəqiqədə Alfonso Deyvis gözəl və baxımlı bir qolla "Santyaqo Bernabeu"nu sükuta qərq edərək "Bavariya"ni hesabda irəli çıxarıb - 0:1.

Madridlilər yalnız 20 dəqiqədən sonra vurulan qolun əvəzini çıxaraq pozulmuş statusu bərpa edə biliblər. "Real"in xilaskarı Xoselu olub. O, Vinisiusun güclü zərbəsindən sonra almaniyalı qapıçı Manuel Noyerin əlindən çıxan topa hamıdan tez çataraq bərabərlik qolunu vurub - 1:1. Bundan 3 dəqiqə sonra (90+1) isə Xoselu yenidən səhnəyə çıxıb. O, dubl edərək "Real"a qələbə qazandıran qola imza atıb - 2:1.

Bununla da, "Real" öz tarixində 18-ci, klubun italiyalı baş məşqçisi Karlo Ançelotti isə 6-ci dəfə qitənin ən nüfuzlu klub turnirinin finalına çıxıb. Xatırladaq ki, bir həftə öncə Almaniyada keçirilən birinci oyunda rəqiblər meydanı sülh şəraitində tərk etmişdilər - 2:2. 

Həlledici final iyunun 1-də İngiltərənin məşhur "Uembli" stadionunda olacaq. Həmin gün Madrid təmsilçisi Almaniyanın daha bir klubu ilə qarşılaşacaq. Rəqib 2013-cu ildə məhz "Uembli" stadionunda "Bavariya"ya qarşı final matçına çıxan Dortmundun (Almaniya) "Borussiya" klubu olacaq.  Əgər finala "Real" deyil, "Bavariya" çıxsaydı, onda Çempionlar liqasının 2013-cu ildəki Almaniya finalı 11 illik fasilədən sonra təkrarlana bilərdi.

Onu da qeyd edək ki, polşalı referi Simon Marcinyakın idarə etdiyi "Real"-"Bavariya" matçında hakim səhvləri də qaçılmaz olub. 

İNTİQAM Məmmədov