Cüdo

---------

Hidayət Heydərov Tokioda tarixi qələbəyə imza atıb

Bu gün Yaponiyanin paytaxtı Tokioda kişi və qadın cüdoçular arasında mövsümün son "Böyük Dəbilqə" turnirinə start verilib. İki gün davam edəcək bu turnirdə Azərbaycan da daxil olmaqla, 88 ölkədən 541 (322 kişi və 219 qadın) tatami ustası medallar uğrunda mübarizəyə qatılıb. Turnirə biri qadın olmaqla 14 cüdoçu ilə qatılan Azərbaycan start günü 7 idmançı ilə təmsil olunub ki, onlardan da ikisi daha yaxşı çıxış edərək, mükafatçılar sırasında yer alıb. Qazanılan medallardan biri qızıl, digəri isə bürünc əyarlı olub. 

Qızıl medal keçirdiyi beş görüşün hamısını qələbə ilə başa vuran Hidayət Heydərovun (73 kq) aktivinə yazılıb. Maraqlı məqamlardan biri, bu il noyabrın əvvəllərində üçüncü dəfə Avropa çempionu adını qazanan Heydərovun həlledici finalda yaponiyalı Soiçi Xoşimotonu məqlub etməsidir. Bununla da Hidayət həm də Gündoğan Ölkənin paytaxtı Tokioda ilk qızıl medal qazanan azərbaycanlı cuducu kimi tarixə düşüb. Onu dekabrın 16-da isə Kosovonun Pristine şəhərində keçiriləcək Açıq Avropa çempionati gözləyir.

Günün bürünc medalını isə 81 kq-da tatamiyə çıxan Zəlim Tskayev qazanıb.

Turnirə sabah yekun vurulacaq.

İNTİQAM Məmmədov