DİN əməkdaşları daha yaxşı olublar

Bu gün Bakı Su İdmanı Sarayında dövlət qurumları arasında üzgüçülük üzrə Azərbaycan çempionatı keçirilib. Gənclər və İdman Nazirliyii və Azərbaycan Üzgüçülük Federasiyasının birgə təşkilatçılığı ilə keçirilən birgünlük yarışda 21 təşkilatı təmsil edən 72 (60 kişi, 12 qadın) idmançı həm şəxsi, həm də komanda formatında mübarizə aparıb.

Gənclər və İdman Nazirliyindən verilən məlumata görə, yarışda DİN idman cəmiyyətinin təmsilçiləri daha fəal olublar.

Belə ki, həm kişilərin, həm də qadınları 50 metr məsafəyə sərbəst üsulla üzmə yarısında DİN əməkdaşları birinci olublar. Kişilərdə Emil İbrahimov, qadınlarda isə Nərgiz Nəsirova qalıb adını qazanıb.

Şəxsi yarışlardan sonra, həm kişilər, həm də qadınlar 4X50 metr məsafəyə estafet yarısında özlərini sınayıblar. Burada da hər iki cinsin  nümayəndələrinin yarısında DİN təmsilçiləri fərqləniblər.

Maraqlıdır ki, eyni məsafəyə qarışıq yarışda da DİN komandası fərqlənib. Bu yarışda SOCAR ikinci, Xəzər Dəniz Gəmiçiliyi isə üçüncü olub.

Yarışın ardından mükafatlandırma mərasimi keçirilib. Qaliblərə müvafiq mükafatları Gənclər və İdman Naziri Fərid Qayıbov, onun müavini Mariana Vasilyeva, Azərbaycan Üzgüçülük Federasiyasının prezidenti Xanlar Fətiyev, Su İdmanı Sarayının direktoru Zaur Yaqubov  və DİN idman cəmiyyətinin sədri Mövlud Mirəliyev təqdim edib. 

İNTİQAM Məmmədov