Daşaltı əməliyyatından 32 il ötür

1992-ci il yanvarın 25-də başlayan və elə ertəsi gün uğursuzluqla başa çatan Daşaltı əməliyyatından 32il keçir. 

Daşaltı kəndi Şuşa qalasının cənub ətəyindəki dərədə, Cıdır-düzyudan aşağıya doğru uzanan sıldırım dağ yamacında yerləşir. Daşaltı kəndi Şuşaya gedən yoldadır. Məhz burada yanvarın 25-də Daşaltı əməliyyatı başladı və elə ertəsi gün uğursuzluğa düçar oldu və Azərbaycanın hərb tarixində qara ləkəyə çevrildi.

Azərbaycan Respublikasının bu şərəfsizcəsinə başa çatan müstəqillik əməliyyatının həyata keçirilməsinə cəmi 3 ay vaxt var idi. Həmin vaxt ərazi erməni quldur dəstələrinin əlində idi və bu Şuşa üçün ciddi təhlükə idi. Digər tərəfdən, daxili çəkişmələr zəminində vəziyyət mürəkkəbləşdi. Ölkənin siyasi arenasında hökm sürən xaos ordudakı vəziyyətə də təsir etməyə bilməzdi. 

1992-ci ilin yanvarında Qarabağda çətin vəziyyət yaranmışdı. Bakıda ictimai-siyasi gərginlik və xaos cəbhəboyu zonada vəziyyəti daha da gərginləşdirmişdi. Erməni silahlıları Qarabağın dağlıq hissəsində azərbaycanlıların yaşadıqları kənd və şəhərləri mühasirəyə almış, sonra onları işğal edərək dinc əhaliyə qarşı qırğınlar törətmiş, evləri, təsərrüfatları qarət etmiş, yandırmışdılar. 1991-ci ilin dekabrında Cəmilli, Kərkicahan və Meşəli kəndlərinin işğalı zamanı Ermənistan silahlı qüvvələri dinc əhaliyə qarşı hərbi cinayətlər törədiblər. Şuşa ətrafında gərgin vəziyyət yarandı. Şuşa-Laçın magistral yolunun yaxınlığında yerləşən Daşaltı kəndindən Ermənistan ordusu Şuşanı və Şuşa-Laçın yolu ilə hərəkət edən maşınları atəşə tutdular. Bu, Şuşada yerləşən Azərbaycan qoşunlarının təchizatında çətinliklər yaradırdı. Mövcud vəziyyəti nəzərə alan Azərbaycan komandanlığı Daşaltı kəndində erməni qoşunlarının atəş nöqtələrinin məhv edilməsi əməliyyatı keçirmək qərarına gəldi. 

Daşalta əməliyyatı 1992-ci il yanvarın 25-də saat 20:00-da başlayıb və yanvarın 26-da axşam saatlarında uğursuzluqla başa çatıb. Şuşa yaxınlığında yerləşən Daşaltı kəndinin azad edilməsi əməliyyatı zamanı Azərbaycan ordusu 90-dan çox itki verib. Əməliyyatda Şuşa şəhərinin müdafiə batalyonunun könüllülərindən və əsgərlərindən ibarət 3 rota iştirak edib. Taktiki səhvlər, qruplar arasında əlaqənin olmaması, əməliyyat sirlərinin açılması və bələdçilərin xəyanəti nəticəsində Nəbilər kəndi istiqamətindən Daşaltıya daxil olan tağımlarımız pusquya düşüb, kəndə daxil olan bir neçə tağım itki verərək geri çəkilib. Döyüşdə ermənilər də bəzi texnika və 80-ə yaxın insan itiriblər.

Azərbaycan xalqının tarixinin ən şanlı səhifələrindən biri olan 44 günlük Vətən Müharibəsində düşməni darmadağın edən rəşadətli Azərbaycan ordusu bu gün aparıcı hərbi hissələrdə tədqiq olunan Şuşa əməliyyatı nəticəsində 70-dən çox yaşayış məntəqəsini, o cümlədən Daşaltı kəndini işğaldan azad edərək, şəhidlərimizin qisasını aldı.